د تکواندو نړیوالې سیالۍ نن د افغانستان په ګډون پیلیږي

د تکواندو نړیوالې سیالۍ نن د سویلي کوریا په موجو ښار کې پیل شوې، چې د دې لوبې سلګونه تکړه لوبغاړي په کې  برخه لري.

د افغانستان تکواندو فدراسیون وایي، دا سیالۍ د جون تر ۳۰مې نېټې دوام کوي، چې د افغانستان په شمول د ۱۸۳ غړو هېوادونو ۹۷۳ لوبغاړي په بېلابېلو ۸ وزنونو کې سیالۍ کوي.

د افغانستان له‌‌خوا دې سیالیو کې د یوې ښځینه لوبغاړي سمیه غلامي په شمول ۵ افغان تکړه د تکواندو ملي لوبډلې لوبغاړي برخه لري.

دغه راز د تکواندو ملي لوبډلې مشري افغانستان ته له المپیک نړیوالو سیالیو څخه د دوو بزونزو مډال ګټوونکی روح الله نیکپا کوي.

سیالیو کې به د افغانستان د تکواندو لوبې د لوبڅارۍ نړیوال سند لرونکی عبدالصبور عمري هم د لوبڅارۍ دنده ترسره کړي.

نوموړی د تکواندو نړیوال فدراسیون په رسمي بلنه دغو سترو نړیوالو سیالیو کې د لوبڅارۍ له‌پاره کوریا ته  ورغلی دی.

د افغانستان د تکواندو فدراسیون وایي، هر لوبغاړی باید د مډال ګټلو له‌پاره د ورځې ۷ سیالۍ وګټي.

دغه راز د سیالیو له پیل مخکې د تکواندو نړیوال فدراسیون مشرۍ له‌پاره ټاکنې هم وشوې، چې ډاکتر چوی چنګ وون د کومې سیالۍ پرته د څلورم ځل له‌پاره د تکواندو نړیوال فدراسیون مشر وټاکل شو.

د سویلي کوریا په نړیوالو تکواندو سیالیو کې به د ۲۰۱۶ کال برازیل المپیک سیالیو ۸ هغه لوبغاړي هغه ولوبیږي، چې د سرو زرو مډالونه یې ګټلي وو.

دا ټولټال ۷ ځل او له ۲۰۱۱ کال وروسته لومړې ځل دی، چې سویلي کوریا د دې سترو نړیوالو تکواندو سیالیو کوربتوب په غاړه لري.