د ۹سوو پهلوانانو راټولېدل؛ ملي لوبډلې ته غړي ټاکل کېږي

د افغانستان غېږنیونې (پهلوانۍ) ملي لوبډلې ته د غورو لوبغاړیو د ټاکلو په موخه نن د افغانستان پهلوانۍ فدراسیون له‌خوا په کابل کې د هېواد په کچه ملي سیالۍ پيل شوې.

د افغانستان پهلوانۍ فدراسیون له لوري دغو سیالیو ته د پلازمېنې کابل په ګډون د ۸ ولایتونو څخه سلګونه لوبغاړي په بېلابېلو وزني کټیګریو کې راغوښتل شوي‌دي چې د حربي ښوونځي په ورزشي جمنازیوم کې یې سیالۍ پیل کړې.

په‌دې سیالیو کې به د کابل په ګډون د پروان، لوګر، ننګرهار، لغمان، پنجشېر، بلخ او هرات ولایتونو څخه ټولټال ۹سوه پهلوانان په ۱۰ بېلابېلو ورزشي کټیګريو کې سیالۍ وکړي.

د افغانستان د بدني روزنې ریاست د معلوماتو له‌مخې، ګډونوال لوبغاړي به د ۵ ورځو له‌پاره په کابل کې وي چې ټولټال د هر وزن ۳ غوره او ټولټال ۳۰ لوبغاړي د افغانستان پهلوانۍ ملي لوبډلې ته غوره شي.

د سیالیو د پرانیستې مراسمو کې د هېواد د المپیک او بدني روزنې ریس حفیظ الله ولي رحیمي ټینګا وکړ چې لوبغاړي باید د پوره دقت او عدالت په نیولو کې غوره شي.

د غه راز ښاغلي رحیمي د افغانستان د دفاع وزارت له مسوولانو نه هم مننه وکړه چې د هېواد په کچه یې د پهلوانۍ ملي لوبډلې غوراوي سیالیو کوربتوب ته زمینه برابره کړه.

ورته مطالب:

افغانستان ۳۵ کاله وروسته په پهلوانۍ کې مډال وګټلو

هندي پهلوان نارسینګ ته المپيک سیالیو کې د لوبېدو اجازه ورکړل شوه