د تخار ځایي مسوولان وايي چې له ۶ میاشتو راهیسې د دې ولایت پولیسو ته د مېوو او ترکاریو د نه رسېدلو تر څنګ له نږدې وخت راهیسې د غوښې او وچې ډوډۍ ور وړل هم بند شويدي.
د تخار د امنیې قوماندانۍ ویاند خلیل اسیر وایي چې د تخار د پولیسو د میوو او ترکاریو قراردادي تښتېدلی دی.
د تخار مرستیال والي او د پولیسو د اعاشې د څار کمېټې مسوول فرید ذکي وايي چې د تدارکاتو کمېټې او قراردادي شرکت ترمنځ د پولیسو د خوراکي توکیو د تامین قراداد لاسلیک شویدی. د تخار والي زیاته کړه چې ستونزه یې له مرکزي حکومت سره شریکه کړېده.
د تخار ولایتي شورا د یوې خبرپاڼې په خپرولو سره ویلي چې باید د تخار د پولیسو قطعو ته لومړی درجه خوراکي مواد ورکړل شي؛ پهداسې حال کې چې د دې ولایت پولیسو ته درېيمه درجه خوراکي توکي ورکول کېږي.
امنیتي ځواکونو ته د خوراکي توکیو د نه رسېدلو موضوع نوې نهده. لهدې مخکې له کندوز او او فاریاب نه هم امنیتي ځواکونو ته د خوراکي توکیو د نه رسېدلو راپورونه خپاره شوي وو.
