د تخار ولایت د خبریالانو مدافع ډلې دغه ولایت کې د هغو دوه ملایانو د نیولو غوښتنه کوي، چې خبریالانو ته یې د سپکاوي ترڅنګ د حکومت پرضد فتوا ورکړې ده.
دوی وايي، د دولت پرضد څرګندونې د طالبانو او نورو ترهګرو ډلو پرګټه دي او حکومت باید ډیر ژر دغه کسان ونیسي او محاکمه يې کړي.
په دې وروستیو کې تخار ولایت کې یوشمېر دیني عالمانو د نظام او دموکراسۍ پر ضد فتوا ورکړې ده او خلک يې د حکومت پر وړاندې وسلهوال پاڅون ته هڅولي دي.
تېره ورځ تخار ولایت کې دوه دیني عالمان هر یو مولوي مبشیر او مولوي سبحان الله په دوو بیلا بیلو غونډو کې د حکومت پرضد فتوا ورکړې او ترڅنګ يې د سیمهییز ټلویزیون یو کامره مین ته هم سپکې سپورې ویلي.
د تخار مرکز تالقانو یو شمېر اوسیدونکي وايي، چې د عالمانو څرګندونې په وران کاریو اغېز لري او ترڅنګ يې دغه څرګندونې د وسلهوالو طالبانو او نورو ترهګرو ډلو په ګټه دي.
د تخار د خبریالانو ټولنې رېیس شفیق پویا هم سلاموطندارته وویل، چې د خصوصي ټلویزیون کامره مین ته سپکاوی د منلو وړ نهدی او غوښتنه کوي، هغه عالمان دې ونیول شي چې د خلکو په منځ کې خبریالانو پروړاندې کرکه خوروي.
د حج او اوقافو وزارت ویاند مخلص تالقاني تاییدوي، چې یو شمېر دیني عالمان د دیني زدهکړو خلاف د جوماتونو له ممبرونو کنځل او د خلکو په منځ کې کرکه خوروي.
د تالقاني پر وینا، په تېره غونډه کې د دیني عالمانو څرګندونې به په جدي توګه وڅيړي او له حکومته غواړي دغه کسان د قانون منګلو ته وسپاري.
نوموړي زیاته کړه: " دا څرګندونې په هغو سیمو کې شوې، چې د امنیتي ځواکونو تر کنټرول لاندې دي او حتا غږ يې هم اوري ولې اقدام نه کوي؟ تخار له ۴ زره ډير مسجدونه لري او د حج او اوقافو وزارت تر کنټرول لاندې رسمي ۱۱۴جوماتونه دي".
په همدې حال کې د تخار ولایت امنیه قوماندان فقیرمحمد جوزجاني وايي، د سیمې قومي مشرانو سلا مشورو وروسته به ددغه دوه ملایانو د نیولو په اړه اقدام وکړي.
نوموړي زیاته کړه، چې دا ډول ملایان له وسلهوالو طالبانو هم خطرناکې دي.
دا لومړی ځل نه دی، چې یو شمېر ملایان تخار ولایت کې د دولت پرضد خلک پاڅوي.
نږدې یوه میاشت وړاندې هم مولوي کبیر چې د تخار د والي د وژنې هوډ يي لرلو د ملي امنیت له خوا ونیول شو او د نورو ملایانو په منځګړيتوب له زندان خوشی او وروسته له نورو ۱۰ ملګرو سره د وسلهوالو طالبانو لیکو سره یوځای شو.
