د افغانستان د بدني روزنې ریاست چارواکي وايي، چې د افغانستان د هنډبال فدراسیون په رسمي بلنه د تاجکستان د هنډبال ملي لوبډله د افغانستان میلمه ده.
د بدني روزنې ریاست چارواکو په وینا د افغانستان او تاجکستان د هنډبال ملي لوبډلو تر منځ د دوستۍ جام په نوم درېیم پړاو سیالۍ د بدني روزنې په ورزشي جمنازیوم کې پیل کیږي.
د یاد ریاست څخه په رالېږل شوې خبر پاڼه کې راغلي، د افغانستان په کوربتوب د ازبکستان او ترکمنستان هنډبال لوبډلې رابلل شوې وې چې د نامعلومو دلایلو له امله رانه غلې.
په همدې حال کې دافغانستان بدني روزنی ریاست ایران ته د افغانستان د رزمي ملي لوبډلې د سفر خبر ور کوي.
د افغانستان د رزمي لوبو ملي لوبډله په نړیوالو (فري فایټ جی ون) سیالیو کې د لوبېدو په موخه د ایران پلازمینیېتهران ته رسیدلې ده.
د بدني روزنې ریاست خبرپاڼه لیکي، چې د افغانستان په ګډون د ایران په کوربتوب په دې سیالیو کې د ۱۱ هیوادونو (فري فایټ) لوبډلې برخه لري.
خبرپاڼه کاږي، په دې سیالیو کې د افغانستان څخه د بېلا بېلو وزنونو ۳۶ تنه لوبغاړي برخه لري، چې ورسره روزونکې او لوبڅارهم ملتیا کوي.
ټاکل شوې ده، چې د (فري فایټ) دغه سیالۍ به سبا په رسمي توګه د ایران په همدان ښار کې پېل شي، چې د راتلونکې اونۍ د (مې) میاشتې تر ۲۳ نیټې پورې به روانې وي.
