په پروان کې امنیتي سرچینې وايي، د «ترهګرو» ډلو اړوند کسانو نن سهار ۱۰:۴۰ بجې یاد هوايي ډګر ته نږدې د یوه موټر په ځای پر ځای کولو سره د بګرام پر نظامي هوايي ډګر راکېټي بریدونه کړي دي.
د پروان د همغږۍ مرکز قوماندان الوزی احمدي د دغه خبر د تایید ترڅنګ، سلاموطندار ته ویلي چې له یاد موټر نه د BM1 دوه بریدونه د پروان هوايي ډګر پر لوري شوي دي.
د نوموړي په وینا، یاد بریدونه په هوا کې د دفاعي سېسټم په وسیله خنثا شوي او مرګژوبله هم نه لري.
هغه وايي، یاد موټر له برید وروسته اور اخیستی دی.
تر اوسه کومې وسلهوالې ډلې د دغه برید مسوولیت پر غاړه نه دی اخیستی، خو د پروان امنیتي مسوولان وايي، ښايي دغه بریدونه د داعش وسلهوالې ډلې له لوري شوي وي.
