د بغلان نهرین ولسوال فضلالدین مرادي وايي، طالبان د ولسوالۍ شاوخوا سیمو کې امنیتي ځواکونو او د ولسي پاڅونوالو سره نښته کې دي او که مرستندویه ځواکونه ور ونه رسېږي؛ نهرین به د طالبانو لاس ته ولوېږي.
د ده په خبره، طالبان د دې ولسوالۍ په ترک او صیاد، تختشاه بدل او جولا سیمو کې له ولسي پاڅونوالو سره په نښته کې ښکېل دي او که هر وخت وغواړي په ولسوالۍ برید کولی شي.
د بغلان ولایتي شورا منشي محمدحنیف ګهګدای هم وايي، نهرین ولسوالۍ کې یوازې ولسي پاڅونوال د ولسوالۍ پر مرکز د طالبانو برید پر وړاندې جګړه کوي.
د ده په خبره، په نهرین کې وضعیت نهایتاً خراب دی او تر دامهاله مرستندویه ځواکونه هم نهدي استول شوي.
د نهرین ولسوالۍ قومي مشر عبدالرشید وايي، د افغان ځواکونو او طالبانو ترمنځ د نښتې له امله تراوسه د ولسوالۍ له څوو کلیو شاوخوا ۵۰۰ کورنۍ بېځایه شوېدي چې ناوړه وضعیت کې ژوند کوي.
خو د بغلان امنیه قوماندان اکرامالدین سریع د دې ولایت نهرین ولسوالۍ کې د پوځي عملیاتو پیلولو لهپاره د چمتووالي خبر ورکوي.
بغلان د هېواد شمالختیځو ولایتونو کې له ناامنه ولایتونو څخه دی چې طالبان یې یو شمېر ولسوالیو کې پراخ حضور لري.
