د بغلان د عامې روغتیا مسوولین وايي، په ۱۳۹۵ کال کې یې ۲۲ زره ۹۷۴ رواني ناروغان یې تداوي کړي دي.
د عامې روغتیا رییس ډاکټر محب الله حبیب د روغتیا نړیوالې ورځې په مناسبت جوړې شوې غونډې کې وویل، تېر کال کې یو میلیون او ۶۰۰ زره ناروغان تداوي شوي، چې ۳ زره هغه یې بستري، ۳ زره او ۶۱۳ جراحي، ۷۴۶ عاجل نظامي او ملکي پېښې او دغه راز یوزرو ۳۳۳ د ترافیکې پېښو د ټپيانو درملنه شوې ده.
د عامې روغتیا رییس وايي، تېر کال د کوچنیانو د درملنې لهپاره یو روغتیايي ټيم جوړ کړی دی او د ده سلاح، خوستوفرهنګ او تالهوبرفک ولسواليو لهپاره یې روغتیايي مرکزونه جوړ کړي.
دی وايي، د بغلان په مرکزي روغتونو کې د نویو زېږېدلو کوچنیانو لهپاره څانګه هم جوړه کړې ده.
د بغلان ولایت د ښځو چارو رییسې خدیجې یقین د روغتیا له چارواکو غواړي چې صحي خدمات او په ځانګړې توګه د رواني ناروغيو درملنې په برخه کې خپل خدمات دې د دې ولایت لرو پرتو سیمو ته پراخه کړي.
سره له دې چې د رواني اختلالاتو او خفګان په ناروغیو د اخته کسانو په اړه کره شمېرې نشته خو په وروستيو کې د روغتیا نړیوال سازمان راپور په ډاګه کوي په هېواد کې له ۲ میلیونو زیات کسان له قسما قسم رواني ناروغيو زورېږي.
په دغه راپور کې فقر او بېوزلي، ناامني، جسمي کمزورتیا، جنسي تاوتریخوالی او د نشي توکو استعمال د رواني اختلالاتو او ژور خفګان له لاملونو ګڼل شوي دي.
