د بغلان ولایت ځينې مدني فعالان، د ولايتي شورا غړي او ديني عالمانو، چې د ډنډغوري، ډنډ شهاب الدین او د مرکزي بغلان ولسوالۍ اوسېدونکي دي د پلخمري په ښار کې سره د اعتراض په ډول را ټول شوي و.
دوی ویل، چې د افغان ځواکونو او د دولت مخالفو ځواکونو ترمنځ د نښتو له امله په دغو سيمو کې ملکي وګړو ته زیان رسيږي.
دغه اعتراض کوونکي خبرداری ورکوي، که چېرې د طالب وسله والو او یا هم افغان امنيتي ځواکونو له خوا ملکي خلکو ته زیان ورسیږي، نو دوی به په لویو مدني لاريونونو لاس پورې کړي.
د دغو اعتراض کوونکو له ډلې يو تن عبدالقدوس تره خېل وايي، چې د بغلان د ډنډغوري له هوکړه لیک لاسليکېدو وروسته په دغه ولایت کې جنګونو زور اخیستی او دغه جګړه د سيمې له خلکو قرباني اخلي.
" موږ له تاسو په ډېره عاجزانه او محترمانه ډول غوښتنه کوو، چې د خدای په خاطر تېرو خبرو پسې مه ګرځئ؛ راځئ! په یوه غږ او قوت ناره وکړو، چې نور جنګ نه غواړو".
د راپورونو پر بنسټ په دې وروستيو کې د ناامنيو له امله يوازې په بغلان ولایت کې په زرګونه کورونه کډه کولو ته اړ شوي دي.
د دغو اعتراض کوونکو له ډلې دوه تنه محمد جبار انصاري او مولوي محمد حسن وايي، چې سيمه ییز چارواکي د بې ځايه شویو او قربانیانو کورنۍ ته ځانګړې پاملرنه نه ده کړې.
محمد جبار وايي: " جيټ الوتکې بمبار کوي، هلیکوپټر په دهشکې ولي، د خلکو چيغې اسمان ته پورته شوې، خو زموږ آه ! څوک نه اوري "
شاوخوا یو میاشت کيږي، چې په ډنډ غوري او ډنډ شهاب الدین کې د خورشيد ۲۰ په نوم چاڼيز عمليات پېل شوي، چې د مدني فعالانو او ځينو اوسېدونکو په وينا په دغو عملياتو کې د پام وړ پرمختګ نه دی شوی.
د سيمې د اوسېدونکو په وینا، تر اوسه په دغو جګړو کې ۱۵۰ ملکي وګړي وژل شوي، شاوخوا ۶۰۰ تنه نور ټپيان شوي، ۳۵ جوماتونه او سلګونه کورونه ویجاړ شوي دي.
