د برېښنايي پېژندپاڼو وېش بهیر په رسمي توګه پیل شو

ولسمشر اشرف غني د برېښنايي پېژندپاڼو وېش بهیر د پیل مراسمو کې تر ټولو وړاندې برېښنايي پېژندپاڼه ترلاسه کړه او ویې ویل، پېژندپاڼې به د امنیتي وضعیت په ښه کېدو او په سمه توګه د اقتصادي پلانونو جوړولو او پلي کولو کې مرسته وکړي.

په دې اړه جوړو شویو مراسمو کې ګڼ شمېر لوړپوړیو چارواکیو او سیاسي څېرو ګډون کړی و.

ولسمشر د برېښنايي پېژندپاڼو وېش لړۍ د نظام‌جوړونې په لور یو اساسي ګام وباله، زیاته یې کړه، دا پېژندپاڼې کولی شي د امنیت په ټینګښت، ګاونډ کې د خپل او پردي معلومولو، د پراختیايي پلانونو پلي کولو او د اقتصادي ودې ترڅنګ نورو ډېرو برخو کې مرسته وکړي.

دغه‌راز اشرف غني وویل، د برېښنايي پېژندپاڼو په وېش سره به افغانستان د لومړي ځل له‌پاره کره احصایې ته لاس رسی پیداکړي او ترهګر به نور ونه شي کولی له تقلبي پېژندپاڼو ګټه پورته کړي.

ښاغلي غني وویل، د دې ترڅنګ به د کاغذي پېژندپاڼو د وېش لړۍ هم دوام ولري او دا دواړه یې موازي پروسې وبللې چې وروسته به په برېښنایي بدلې شي.

هغه ټول هېوادوال د پېژندپاڼو اخیستو ته راوبلل.

ولسمشر شاوخوا یوکال مخکې د برېښنايي پېژندپاڼو د وېش فرمان صادر کړی و، خو د ځېنو کسانو مخالفتونو له کبله دغه لړۍ نن د ښاغلي غني له لوري د لومړنۍ پېژندپاڼې له اخیستو وروسته پیل شوه.

دغو پېژندپاڼو کې نوم، د پلار نوم او د زېږېدلو ځای په لایزر سره هکاکي کېږي او د پېژندپاڼې شاته یو چیپ هم لګېدلی چې د هغه په واسطه جواز سیر، د موټرچلولو لېس‌نس، روغتیايي معلوماتو، د پاسپورټ ترلاسه کولو او نورو دولتي خدمتونو ته لاس‌رسي اسانه کېږي.