د زابل بې ځایه شوې کورنۍ وايي، وزګارتیا، د خوراکي او غیرخوراکي توکیو لوړي بيې او د دولت نه پام د دوی ژوند ور تریخ کړیدی.
دا کورنۍ ـ چي د ناامنیو او وچکالیو په سبب له بېلابېلو ولسوالیو مرکز کلات او نږدې ولسوالیو ته کډه شوي ـ په ساړه ژمي کې د مرستو غوښتنه کوي.
د زابل د طبیعي پېښو پرضد ریاست د معلوماتو لهمخې، پهدې ولایت کې د ناامنیو او وچکالۍ له امله شاوخوا ۱۳ زره کورنۍ مرکز کلات او نږدې ولسوالیو ته کډه شوېدي.
له دایچوپان او شملزو ولسوالیو بېځایه شوي چې د زابل ولایت د طبیعي پيښو پرضد مبارزې ریاست مخې ته راټول شوي سلام وطندار ته وویل، پر کورنۍ او ماشومانو يې هره شپه لکه کال اوږده تېرېږي.
د زابل ولایت د طبیعي پېښو پرضد مبارزې رييس سمیعالله شهامت د بېځایه شویو کډوالو ستونزې مني؛ خو وايي چې تل یې د اړمنو غږ اورېدلی او د اړتیا پر وخت يې له کره سروې وروسته هري کورنۍ ته مرستي رسولې دي.
ښاغلی شهامت وايي، مستحقې کورنۍ له مرستو نه پاتې کېږي او د دوی مرستی ورسره روانې دي.
د ده په وینا، بې له خاکافغان ولسوالۍ د ټولو ولسوالیو له بېځایه شویو کډوالو سره د کرني ریاست په همکارۍ مرسته شوېده.
د زابل ولایتي شورا رییس عطاجان حقبیان هم له بېځایه شویو او وچکالۍ ځپلو سره د طبیعي پېښو پرضد مبارزې ریاست مرستي مني؛ خو وايي چې دا مرستې بسنه نهکوي.
ښاغلی حقبیان زیاتوي، دا مهال د زابل له ولسوالیو د ناامنیو او وچکالۍ په سبب بېځایه شوې کورنۍ له سختو اقتصادي ستونزو کړېږي او باید دولت او د خیر ـ ښېګڼې موسېسې ډېره مرسته ورسره وکړي چي په دغه ساړه ژمي کې د ستر بشري ناورین مخنیوی وشي.
زابل د کابل – کندهار پر لویه لار پروت ولایت دی چې په تېرو ځېنو ولسوالیو کې يې د وچکالۍ ترڅنګ طالبان فعال دي او یوه ولسوالۍ (خاک افغان) خو له ۱۸ کالو راهیسې طالبانو قبضه کړېده.
