په بدخشان کې د ولسي جرګې د نوماندانو ناظرین وايي، د ولسي جرګې د ټاکنو د رایو بیا شمېرنه ښیي چې د ټاکنو کمېسیون کارکوونکیو له لوري درغلۍ شوي او دغو درغلیو ته په بیا شمېرنې کې پاملرنه نه کېږي.
د دوی په خبره، په بدخشان کې د ټاکنو کمېسیون چارواکي د خپلې خوښېوړ نوماند رایه له ۴ نه ۸ ته او له ۸ نه ۸۰ او ۱۰۰ ته پورته کوي.
دوی د درغلۍ ډېره برخه د دې ولایت د ټاکنو کمیسیون پر مشر ور اچوي او زیاتوي چې رییس پهخپل هم وايي چې د کمېسیون کارکوونکي چې هر څه وغواړي کولی یې شي.
خو په بدخشان کې د ټاکنو خپلواک کمېسیون چارواکي یادې ادعاوې بېبنسټه بولي او وايي، د ۶۰ مرکزونو رایي بیاځلي په بریالي توګه شمېرل شوې دي او له تېرې ورځې راهیسې یې د ۲۰۰ نورو محلونو بیاځلي رایه شمېرنه پیل کړېده.
په بدخشان کې د ټاکنو خپلواک کمېسیون ولایتي دفتر مشر روحالله موسوي وایي چې د رایو بیا شمېرنه د د فیفا، تیفا او د نوماندانو ناظرینو په مخکې کېږي چې یوه کوچنۍ تېروتنه هم ناممکنه ده.
په بدخشان کې د فیفا استازی عبدالله حمیدزاده وایي چې دا بنسټ د رایو شمېرنې له بیاځلي بهیره جدي څارنه کوي؛ خو د نوماندانو ناظران بیا د نظارت پرځای د خپلې خوښې نوماند ته د رایو په راټولولو پسې ګرځي.
د رایهاچونې د صندوق د رایو او د پایلو جدول ترمنځ توپير، له ناامنو سیمو د رایې اچونې صندوقونو را ټولول، د پایلو په جدول کې د محل د رییس د لاسلیک او مهر نهشتوالی او له بایومټریک پرته کارول شوې رایي هغه ټکي دي چې د رایو شمېرنې په بیاځلي بهیر کې ورته باید پاملرنه وشي چې پاکې او ناپاکې رایې سره بېلې شي.
خو د نوماندانو ناظران وايي چې د ټاکنو کمېسیون نه یوازې ذکر شویو ټکو ته پام نهکوي، بلکې د ټاکنو په پایله کې لاسوهنه هم کوي، دا هغه ادعاوې دي چې د ټاکنو کمېسیون د چارواکیو له لوري رد شويدي.
