د بامیانو د پښتنو او تاجیکانو عدالت غوښتنې جنبش غړیو په کابل کې خپلې درویشتمې اعتراضيه غونډه کې، د بامیانو والي طاهر زهیر په قومي پاکسازۍ، انسان تښتونې او د لرغونو اثارو په قاچاق تورن کړ.
د بامیانو د پښتنو او تاجیکانو عدالت غوښتنې جنبش غړی محی الدین فرهمند وايي، طاهر زهیر د قومي او حزبي تعصب له امله د بېلابېلو وزارتونو او ادارو له ۲۰۰ زیات اجرایي مکتوبونه چې بامیانو ته استول شوي؛ ځواب نه دی ورکړی.
ښاغلی فرهمند د بامیانو د والي دندې ځنډولو او قانوني تعقیب غوښتنه کوي.
بل معترض ملا حضرت ګل اخوند، د بامیانو والي د خپلې لور په تښتولو تورنوي او وايي، اسناد لري چې د بامیانو والي طاهر زهیر له دې قضیې نه د تېرېدو په خاطر نوموړي ته د ۱۰۰ زرو ډالرو ورکړې وړاندیز هم کړی دی.
خو د بامیانو والي طاهر زهیر د ځان پر وړاندې دغه تورونه بېبنسټه بولي او وايي که دغه ډول دروغ ځېنې خلک خوشاله کوي اجازه ورکړئ چې ویې وایي.
بلخوا په داسې حال کې چې د اعتراض کوونکیو په وینا، د بامیانو والي د ولسي جرګې د کورني امنیت کمېسیون له لوري د یوې ۱۳ کلنې نجلې په تښتولو کې د لاس درلودو په تور څارنوالۍ ته معرفي شوی، خو د لویې څارنوالۍ ویاند جمشید رسولي وايي، په دې اړه هغوی ته رسمي مکتوب نه دی رسېدلی.
