د امریکا د استازیو جرګې د ایران پر وړاندې د دغه هېواد د ولسمشر د نظامي عملیاتو د اړوندو واکونو طرحه تصویب کړه.
دا طرحه له هغه وروسته جوړه شوې چې د ډونالډ ټرمپ په مستقیم امر امریکايي ځواکونو د ایران د سپاهپاسداران د قدس ځواکونو قوماندان قاسم سلیماني وواژه او دغه راز یې د ایران پر وړاندې د نورو نظامي اقداماتو ګواښونه وکړل.
ټرمپ د یادې طرحې مخالفت کړی او د دغه هېواد له دواړو جرګو یې غوښتي وو چې رایه ور نه کړي. خو نانسي پلوسي په مشري د امریکا د استازیو جرګې بېګاه مازدیګر یادې طرحې ته رایې ورکړې چې د ۲۲۴ مثبتو او ۱۹۴ منفي رایو په خپلولو سره تصویب شوه.
د دغې طرحې له مخې، د امریکا ولسمشر باید د ایران پر وړاندې خپل نظامي اقدامات ودروي، خو نوموړی دا کار د دواړو جرګو له هوکړې وروسته کولای شي.
د سپینې ماڼۍ د مطبوعاتو یوه مسوول هوګان ګیدلي یاده طرحه خندوونکې بللې او ویلي یې دي چې د باور وړ نه ده او عملي به هم نه شي.
نوموړي د یادې طرحې په غبرګون یوه طرحه کې ویليو «ولسمشر حق او دنده لري چې د ترهګرۍ پر وړاندې د خپل هېواد او خلکو ساتنه وکړي. دا هغه کار دی چې بیا به یې هم وکړي او ځکه خو نړۍ یو امن ځای دی.»
ګیدلي زیاته کړې، ډونالډ ټرمپ د اساسي قانون له مخې د ټولو ځواکونو د عمومي قوماندان او د اجراییه قوې د رییس په توګه او دغه راز د نظامي ځواک کارولو په برخه کې د ۲۰۰۲ کال جواز له مخې پر قاسم سلیماني برید شوی دی.
دغه طرحه د ۱۹۷۳ کال د جګړهییزو واکونو پر مصوبې استناد کوي چې له مخې یې د امریکا دواړو جرګو ته واک ورکړی چې د نظامي ځواک کارولو په برخه کې د ولسمشر د اقدام مخه ونیسي.
