د اسیا فوټبال شورا په جوړښت کې نوی مرکزي زون جوړ شو، چې په رسمي توګه یې تېره اونۍ د کویټ په هېواد کې خپل مسولان، اساسنامه او لوګو اعلان کړه.
د افغانستان فوټبال فدراسیون د یوې خبرپاڼې په خپرولو سره وایي، چې په دې مراسمو کې د افغانستان فوټبال فدراسیون چارواکو هم برخه اخیستې وه.
اعلاميه کاږي، د راتلونکو څلورو کلونو له پاره په کې د افغانستان فوټبال فدراسیون مشر کرام الدین کریم د اجرایوي کمېټې د غړي اوهمدا راز د افغانستان فوټبال فدراسیون سکرترجنرال سېد علي رضا اقا زاده د دې زون د مرستیال سکرترجنرال او د نړېوالو اړیکو د مسول په توګه وګمارل شو.
په خبرپاڼه کې راغلي، چې د اسیا مرکزي زون د ښځینه اجرایوي کمېټې یوه چوکۍ افغانستان ته ورکړل شوې ده، چې د دغه پوسټ له پاره به ډېر ژر اړوند افغان چارواکي يوه ښځينه کارکوونکې ور وپېژني.
افغان فوټبال فدراسیون ادعا کوي، چې د اسیا فوټبال شورا په چوکاټ کې د مرکزي زون د ایجادولو طرحه او تشکیل د افغانستان فوټبال فدراسیون له خوا وړاندې شو، چې د اسیا او نړېوالې فوټبال شورا له خوا منظور شو.
باید و ویل شي، چې په مرکزي زون کې به د افغانستان په ګډون د ایران، تاجکستان، قرغزستان، ترکمنستان او ازبکستان پیاوړي فوټبال ملي لوبډلې لوبې ترسره کړي.
له وړاندې افغانستان په سویلي اسیا فوټبال زون کې لوبې ترسره کولې، چې اوس مهال د افغانستان فوټبال ملي لوبډله د دې سیالیو د اتلولۍ جام هم له ځان سره لري.
افغانستان په ۲۰۱۳ زيږديز کال کې هندوستان ته په ماتې ورکولو سره یی ترلاسه کړی و.
ښایي په مرکزي زون کې افغانستان د سویل زون په پرتله له سختو سیالو لوبډلو سره لوبې ترسره کړي؛ خو د فوټبال فدراسیون هیلمند دی، چې سختې سیالۍ د افغانستان فوټبال له پرمختګ سره ډیره مرسته کولای شي.
د ویلو ده، چې د افغانستان فوټبال ملي لوبډلې د فوټبال نړېوالې شورا په نوې اعلان شوې درجه بندۍ کې خپل ۱۴۲ م مقام له لاسه ورکړی او ۱۴۴ م مقام ته کښته شوی دی.
