.jpg)
ټاکل شوېده د افغانستان هاکي ملي لوبډله روان کال د لومړي ځل لهپاره د پاکستان په کوربتوب پلان شوي د (Open Series) هاکي سیالیو کې ولوبېږي.
د افغانستان ۱۸ کسیزه هاکي ملي لوبډله ـ چې ورسره ۲ روزونکي، یو منیجر او یو لوبڅار هم ملګری و ـ نن د پاکستان په لور روانه شوه.
ښاغلي رحیمي هاکي ملي لوبډلې سره د لیدنې پرمهال دوی تشویق کړل چې د پاکستان په کوربتوب په اسیایي هاکي سیالیو کې ښې لوبې وکړي.
د افغانستان بدني روزنې ریاست د معلوماتو لهمخې، د هاکي دغه سیالۍ به د روانې ډېسمبر پر ۱۷مه پیل او تر ۲۶مې نېټې به روانې وي؛ خو پاکستانۍ رسنیو بیا د پای نیټه د ډېسمبر ۲۲م ښودلې ده.
د ترلاسه شویو معلوماتو پر اساس، د افغانستان هاکي ملي لوبډلې ترڅنګ به پهدې سیالیو کې د قزاقستان، نیپال او اوزبیکستان او هاکي ملي لوبډلو سره د لاهور ښار په هاکي ملي لوبغالي کې لوبې وکړي.
د پاکستان «دی نېشن» ورځپانې له قوله، د پاکستان هاکي ملي لوبډله به ځکه پهدې سیالیو کې ونه لوبېږي چې یاده لوبډله په راتلونکې جنورۍ کې په یو بل ټورنمېنټ ګډون کوي.
.jpg)
د ورکړل شوي مهالوېش لهمخې به افغانستان لومړۍ لوبه د افغانستان پر وخت ماسپښین یوه نیمه بجه د ډېسمبر پر ۱۷مه نېټه له اوزبیکستان سره، دویمه لوبه د ډېسمبر پر ۱۹مه مازیګر ۳ نیمې بجې له قزاقستان سره او وروستۍ لوبه د ډېسمبر پر ۲۱مه ماسپښین يوه نیمه بجه له نیپالۍ هاکي ملي لوبډلې سره وکړي.
ټاکل شوې، د پاکستان په کوربتوب به له پاکستان پرته ۴ لوبډلې د اتلولۍ ګټلو هڅه کوي چې موخه یې په وروستیو کې نړۍوال سیریز ته لاره موندل او له هغه نه راتلونکي المپیک ته د غورو لوبډلو غوراوی دی.
د هاکي «اوپن سیریز» سیالۍ د نړۍ د ۵ وچو د ۴۶ هېوادونو هاکي ملي لوبډلو ترمنځ د روان کال جون پر ۵مه پیل شوېدي او په رسمي توګه به په ۲۲مه نېټه پای ته ورسېږي.
دغه لوبې وړاندې د پاکستان په لاهور ښار کې پلان شوېوې؛ خو لوبډلو هغه مهال د امنیتي ستونزو له کبله پاکستان ته ورتګ رد کړ.
ورته سیالۍ د نړۍ په یو شمیر نورو هېوادونو لکه د زمبابوی په بولاوایو، د چیلي په سنټیاګو، د پرتګال په لاوسادا، د پولینډ په جينزنو، د وانواټو په پورټ ویلا، د کروشیا په زیګریب، په سنګاپور او مکسیکو هېوادونو کې هم شوېدي چې غورو لوبډلو ترې بل پړاو ته لاره پیدا کړېده.
