دغو زدهکړیالانو د ادارې او سوداګرۍ، معلوماتي ټکنالوژۍ، اقتصاد او کمپیوټر ساینس په برخو کې له دغه پوهنتونه د فراغت سندونه ترلاسه کړل.
په دې اړه جوړو شویو مراسمو ته په افغانستان کې د امریکا سفیر جان بس، د اغاخان بنسټ استازي نورجهان موانی، د افغانستان د لوړو زدهکړو پخوانی وزیر محمد شریف فایز او یوشمېر چارواکي ورغلي وو.
د افغانستان امریکايي پوهنتون رییس دوکتور کینت هالند د دغه پوهنتون د زدهکړیالانو ۸مې دورې فراغت غونډې ته وویل، دا فراغت ښيي چې افغانان د زدهکړو پر لاره کې خنډونه لېرې کوي او په دې لاره کې هڅهکوونکي دي.
محمد شریف فایز فراغت غونډه کې وویل، د علم او پوهې زدهکړه د افغانستان د نیکمرغه کېدو په معنا دی او ځوانان د دې هېواد بنیادي پانګه ده. په خبره یې هغوی چې د فراغت سندونه ترلاسه کوي د سبا ورځې غوره مدیران دي.
په افغانستان کې د اغاخان بنسټ استازي نورجهان مواني وویل، د زدهکړیالانو په ټولګي کې د مېرمنو زیات حضور د خوشالۍ ځای دی. د غونډې په پای کې ښاغلي نورجهان مواني ته د افغانستان امریکايي پوهنتون لهخوا افتخاري دوکتورا هم ورکړل شوه.
د افغانستان امریکايي پوهنتون په ۲۰۰۶ کال کې د امریکا نړیوالې پراختیايي ادارې په مرسته په کابل کې فعالیت پیل کړ. دغه پوهنتون له ادارې او سوداګرۍ، معلوماتي ټکنالوژۍ، اقتصاد او کمپیوټر ساینس پوهنځیو سربېره د ظرفیت لوړونې کوروسونه هم لري.
