.jpg)
ټاکل شوې ده، د افغانستان فوټبال ملي لوبډله سبا په یوه نړیواله دوستانه سیالۍ کې د مالیزیا فوټبال ملي لوبډلې پر خلاف د لوبې ډګر ته ووځي.
د افغانستان فوټبال فدراسیون د یوې خبرپاڼې په خپرولو سره وایي، سیالۍ به سبا مازیګر ۵ بجې او ۱۵ دقیقې د مالیزیا په پلازمېنې (کولالمپور) کې پیل شي.
د دواړو فوټبال ملي لوبډلو ترمنځ به د یاد هېواد په (شاه عالم) فوټبال نړیوال لوبغالي کې د تاریخ لومړۍ فوټبال سیالۍ وشي.
خبرپاڼه لیکي، د افغانستان فوټبال ملي لوبډله له یوې اونۍ راپه دې خوا په مالیزیا کی په تمریناتو بوخته ده او د سبا ورځې سیالۍ ته پوره چمتووالي لري.
په افغان فوټبال ملي لوبډله کې دا ځل ۵ کورني او پاتې نور بهرمېشتي افغان لوبغاړي برخه لري.
افغان فوټبال ملي لوبډله په داسې حال کې د مالیزیا فوټبال ملي لوبډلې پر خلاف سیالي کوي، چې تېره میاشت یې په لبنان کې کوربه لوبډلې ته ۲ د ۰ ګول پر وړاندې ماتې خوړلې ده.
.jpg)
د یادونې ده، چې اوسمهال د افغانستان فوټبال ملي لوبډله د کوربه مالیزیا فوټبال ملي لوبډلې پر خلاف ذهني مخکیوالي لري، چې په نړیواله درجه بندۍ کې مخکې ده.
افغان فوټبال ملي لوبډله د فوټبال نړیوالې شورا (فیفا) په درجه بندۍ کې ۱۴۹م مقام کې او کوربه مالیزیایۍ فوټبال ملي لوبډله بیا ۱۵۸م مقام کې ده.
د سبا ورځې سیالۍ له پاره د افغانستان په اعلان شوې ۲۶ کسیزه لوبډله کې یوسف مشرقي له اوږد ځنډ وروسته بېرته ملي لوبډلې ته راغوښتل شوی؛ خو مصطفی ځاځی، خېبراماني او میلاد سالم د ټپونو له کبله د مالیزیا پر خلاف سیالۍ کې نه دي اخیستل شوي.
په اعلان شوې لوبډله کې اویس عزیزي، ایمل ګریوال او حمید الله وکیلي د ګول ساتونکیو، مسیح سیغاني، روح الله اقبالزاده، سید محمد هاشمي، حسن امین، میلاد انتظار، انوش دستګیر او مجیب جمالي د دفاع لیکې، اباسین علي، کنیشکا طاهر، احمد ارش هاتفي، محمد یوسف مشرقي، فردین حکیمي، محمد صابرعزیزي، قسمت احمدي، نورځدران، قمرالدین مزیارکوهیار، حسیب رحیم او ادریس هوشمند د منځنۍ لیکې او زبیرامیري، نورالله امیري، فیصل شایسته، یوسف شېردل او امید پوپلزی د برید لیکې له پاره په لوبډله کې اعلان شوي دي.
