ټاکل شوېده، سږ کال د (IPL-BPL-BBL-CPL) سوداګریزو کرکټلیګونو په څېر د افغانستان کرکټ بور او افغانان هم د یو سوداګریز کرکټلیګ خاوندان شي.
د افغانستان کرکټ بورډ مشر عاطف مشعل پرون په همدې موخه د یوې غونډې په ترڅ کې د هندوستان له (SINXER SPORTS) کمپنۍ له مشر ویکاس سره تړون لاسلیک کړ او په نوي ډهلي کې مېشتې دغه کمپنۍ د افغانستان کرکټ بورډ د پانګونې په برخه کې همکاره شوه.
ښايي د افغانستان لومړی پړاو (AT20PL) لومړی پړاو سیالۍ به د روان کال اکتوبر کې د عربي اماراتو په کوربتوب وشي.
د سنیکسر سپورټس کمپنۍ د مسوولانو په وینا، د افغانستان په شل اوریز پریمیرلیګ سیالیو کې به ۵ لوبډلې ګډون ولري چې له نږدې ۱۸ ـ ۲۱ ورځو پورې ۲۳ سیالۍ وکړي.
ویل کېږي چې پهدې سوداګریز کرکټلیګ کی به ګډونوالې لوبډلې دوه ځلې یو بل سره په تګ او راتګ پړاو کې لوبې وکړي.
د کمپنۍ مسوولانو دغه راز وویل، پهدې سیالیو کې به له ۱۸ نیولې تر ۲۴ پورې مشهوره بهرني او له ۷۵ نیولې تر ۱۰۰ پورې د افغانستان کورني لوبغاړي بولۍ ته وړاندې شي.
د مسوولانو په وینا، دغو سیالیو کې به د افغانستان لوبغاړیو ترڅنګ د پاکستان، سریلانکا، بنګلهدېش، سویلې افریقا، اسټرالیا، ویسټانډيز، انګلستان، نیوزیلینډ، زمبابوی او ایرلینډ هېوادونو لوبغاړي ولوبېږي چې په کافي اندازه پیسې به ترلاسه کړي.
دغه راز د سیالیو د ژوندي بهیر خپرولو لهپاره د هندوستان سوني او سټار سپورټس ترڅنګ د اسټرالیا فوکس سپورټس او افغانستان ۱ تلوېزیون څخه به یوه شبکه د زیاتو پیسو او ښه امکاناتو په وړاندې کولو سره د دې سیالیو د خپرولو حقوق ترلاسه کړي.
د افغانستان کرکټ بورډ عمومي مشر عاطف مشعل پهخپلو خبرو کې وویل چې افغان شل اوریز پریمیرلیګ به نه یوازې افغان کرکټ بورډ ته د کال میلیونه ډالر ګټه راوړي تر څنګ به یې افغان لوبغاړیو ته د نړۍ د مشهورو لوبغاړیو ترڅنګ او د هغوی خلاف د لوبېدو زمبنه برابره کړي او هم به نړیوالو ته د افغانستان ریښتونی انځور وړاندې کړي.
دغه راز د کرکټ بورډ اجرایوي مشر شفیقالله ستانکزي هم غونډې کې وویل چې د تېرکال په څېر سږ کال هم په ښه زېري پیلېږي او د دوی خوب یو بل په پسې په حقیقت بدلېږي.
د نوموړي په وینا، د افغانستان شل اوریز پریمیرلیګ به په نړیوال معیار برابر لیګ وي او د دوی موخه ده چې دغه لیګ په راتلونکي کې د نړۍ په کچه په درېیوو بهترینو کرکټ لیګونو کې ودروي.
د ښاغلي ستانکزي په باور، د افغانستان شل اوریز پریمیر لیګ به تر راتلونکیو ۶ کلونو پورې افغان کرکټ بورډ ته کم ترکمه ۱۲ او زیات نه زیات تر ۴۰ میلیونه ډالرو خالصه ګټه ولري.
د یادونې ده چې د تېرو پرلهپسې ۶ کلونو راپهدېخوا افغان کرکټ بورډ په کابل کې د (شپږیزې) تر نامه لاندې شل اوریز سوداګریز کرکټلیګ کوي چې په وروستیو ۲ پړاونو کې پهکې بهرني لوبغاړي هم ولوبېدل؛ خو دا به لومړی ځل وي چې افغان کرکټ بورډ په نړیوال معیار برابر، د نړۍ مشهورو لوبغاړو په موجودیت او په نړیوالو لوبغالو کې خپل لومړی پړاو شل اوریز پریمیرلیګ سیالۍ کوي.
