په کابل کې د افغانستان د ۱۷ ولایتونو په استازیتوب د هېواد د ۸ زونونو منتخبو لوبډلو ترمنځ د فوټسال سیالۍ د افغانستان فوټبال فدراسیون د مشر کرام الدین کریم او نورو لوړو پوړو ورزشي چارواکو په شتون کې په رسمي توګه د فوټسال په ځانګړي ورزشي جمنازیوم کې پرانیستل شو.
د افغانستان فوټبال فدراسیون د یوې خبرپاڼې په خپرولو سره وایي، چې پدې لوبو کې به ټولې لوبډلې په لیګ بڼه یو بل سره لوبې ترسره کړي.
د فوټبال فدراسیون خبرپاڼه لیکي، چې په دې سیالیو کې د کابل الف، کابل بي، هرات، بلخ، نیمرزو، فراه، د شمال منتخبه لوبډله او د مرکز منتخبه فوټسال لوبډلې برخه لري.
چارواکي زیاتوي، چې په لومړي پړاو زونونو فوټسال سیالیو کې به د افغانستان فوټسال ملي لوبډلې ته غوره لوبغاړي په نښه شي.
د فوټبال فدراسیون د پلان له مخې به د سیالیو په پای کې ۱۸ تنه غوره لوبغاړي د لوبڅارانو له خوا د افغانستان فوټسال ملي لوبډلې غړیتوب ترلاسه کړي.
د یادونې وړ ده، چې دغه سیالۍ د افغانستان فوټسال ملي لوبډلې د مشر روزونکي عبدالرزاق له خوا نېږدې څارل کیږي ترڅو تکړه لوبغاړي جذب کړي.
