د ولسي جرګې لومړي مرستیال همایون همایون د «افغانستان خلکو اېتلاف» ګوند جوړېدو مناسبت غونډه کې وویل چې د حکومت ځېنې جوړښت فساد ته لمن وهي.
همایون په تېرو ولسمشریزو ټاکنو کې د غني ملاتړی و او د ملاتړ له کبله یې له خلکو بښنه وغوښته. وايي، د یو مشروع او قانوني حکومت لهپاره یې د غني ملاتړ کړی و؛ اوس پښېمانه دی.
د جرګې بل غړی محمدنعیم لالی حمیدزی چې په دې غونډه کې ګډون کړی و. وویل، په خپل وخت دې رڼې ټاکنې ترسره شي. زیاته یې کړه، د حکومت نسکورېدو پلوی نه دی، بلکې د دغه ګوند په جوړېدو هڅه کوي د حکومت په جوړښت کې سمون راولي.
لالي حمیدزي د ښاغلي ګلبدین څرګندونو ته په اشارې وویل، ځېنې د نورو هېوادونو په استازيتوب خبرې کوي او ځېنې بیا د خلکو په منځ کې د نفاق اچولو په لټه کې دي.
ښاغلی حمیدزی وايي، حکومت یوازې د دوو یا درېیو کسانو نه دی چې هر څه یې په زړه وي ترسره یې کړي.
په دې غونډه کې د ولسي جرګې بل غړي ظاهر قدیر وویل کله چې د ولسمشر غني په چاپېره کې یې ځېنې اشخاص ولیدل وپوهېد چې حکومت په بل لوري روان دی او له کبله یې د ارګ پروړاندې ډله جوړه کړه.
ښاغلی قدیر هم وايي، په ټاکنیزو منډو ترلړو کې یې له غني ملاتړ کړی، خو غني د خلکو په رایو معامله وکړه. دی وايي، د «افغانستان خلکو اېتلاف» ګوند د ولسوالیو له شورا نیولې تر ولسمشریزو ټاکنو خپل نوماندان لري او ډېرژر به ولسمشرۍ څوکۍ ته خپل نوماند ورمعرفي کړي.
په دغه غونډه کې د ختیځو، سویل او سویل ختیځو لسګونو استوګنو ګډون کړی و.
