افغان کرکټ بورډ رسماً اعلان وکړ، چې راتلونکې میاشت به د یو لړ نړېوالو سیالیو لوبولو له پاره زمبابوی هېواد ته سفر وکړي.
د افغانستان کرکټ بورډ له خوا په ورکړل شویو معلوماتو کې د زمبابوی ویبپاڼې (کرونیکل) هغه راپور رد کړ، چې ګواکې د افغانستان او زمبابوی ترمنځ کیدونکې سیالۍ یواځې ۵۰ اوریزه او۲۰ اوریزې دي.
کرکټ بورډ زیاتوي، چې له زمبابوی کرکټ ملي لوبډلې سره راتلونکې میاشت ټولې پلان شوې ۷ سیالۍ به له کرکټ نړېوالې شورا سره نړیوال امتیاز ولري او هم په تلویزون مینه والو ته په ژوندۍ بڼه خپرې شي.
ویل کیږي، چې دغه سفر د افغانستان او زمبابوی کرکټ بورډونو له خوا د کرکټ نړېوالې شورا په همغږۍ برابر شوی دی.
د کرکټ بورډ له خوا د ورکړل شویو معلوماتو له مخې چې د افغانستان او زمبابوې کرکټ ملي لوبډلو ترمنځ د سیالیو پیل به په ۵۰ اوریزه نړېوالو سیالیو وشي.
ورکړل شوي مهالویش له مخې به د ۵ نړېوالو یو ورځنیو سیالیو لړۍ د راتلونکې اکټوبر میاشتې په ۱۶ مه نیټه پیل او تر ۲۴ مې نیټې به پاې ته ورسیږي.
د مهال ویش له مخې به د لومړۍ او ووستۍ سیالۍ ترڅنګ دوهمه نړیواله لوبه د اکتوبر په ۱۸ مه ، دریمه لوبه د اکتوبر په ۲۰ مه ، څلورمه لوبه د اکتوبر په ۲۲ مه نیټه ترسره شي.
دغه راز د ۲ نړیوالو شل اوریزه لوبو لپاره افغان کرکټ بورډ د اکتوبر ۲۷ مه او ۲۹ مه نیټه اعلان کړیده.
د یادونې وړ ده، چې دا د کرکټ په تاریخ کې دویم ځل دی چې افغانستان د یوه بشپړ نړېوالو یو ورځنیو سیالیو ترسره کولو له پاره د یوه بشپړ غړیتوب لرونکي هیواد میلمنه ده.
د افغانستان او زمبابوی کرکټ ملی لوبډلو ترمنځ تېرکال جولای میاشت کې هم ۴ نړیوالې پنځوس اوریزې او ۲ څلور ورځنۍ سیالۍ ترسره شوې، چې په مساوي توګه پاي ته رسیدلې وې.
