.jpg)
د ازبکستان په کوربتوب د ۱۵ کلنو مرکزي اسیا فوټبال جام سیالۍ بېګا شپه پای ته ورسېدې چې افغانستان پهکې څلورم مقام ترلاسه کړ.
د افغانستان فوټبال فدراسیون د معلوماتو لهمخې، افغان ۱۵ کلنې فوټبال ملي لوبډلې په بېګانۍ سیالۍ کې له کوربه ازبکستانۍ لوبډلې سره له کوم ګول نه پرته لوبه په مساوي توګه پای ته ورسوله.
د لیګ او ټولټال ۵ سیالیو وروسته دفاعي اتلې افغان ۱۵ کلنې فوټبال ملي لوبډلې د تېرکال اتلولي او لومړی مقام لرل؛ خو سږ کال ۴ مقام ته راولوېدلو او دغه سیالۍ یې په ۲ بریاوو، دوو ماتو او یوې مساوي لوبې سره د څلورم مقام په ګټلو سره پای ته ورسولې.
دویم پړاو کې افغانستان د تاجکستانۍ لوبډلې پر خلاف ۳ د صفر ګول پر وړاندې په سترې ماتې سره پیل کړې چې ورپسې لوبې کې یې قرغزستانۍ لوبډلې ته ۲ د ۱ ګول پر وړاندې ماتې ورکړه.
.jpg)
افغان لوبډلې په درېیمې لوبې کې له ښې لوبې وروسته د ایران پر وړاندې یو د صفر ګول پر وړاندې ماتې وخوړه؛ خو د ازبکستان پر وړاندې له مساوي لوبې مخکې یې څلورمه لوبه کې ترکمنستانۍ لوبډلې ته ۳ د صفر ګول پر وړاندې ستره ماتې ورکړه.
د یادو سیالیو په پای کې ایرانۍ ۱۵ کلنې فوټبال ملي لوبډلې سره په سر ۵ واړه سیالۍ وګټلې او په لومړي مقام خپلولو سره د اتلولۍ جام پورته کړ چې ازبکستان دویم او تاجکستان درېيم مقام ترلاسه کړ.
دغه راز قزغستانۍ لوبډلې چې په وروستۍ لیګلوبه کې یې ترکمنستانۍ لوبډلې ته ۴ د صفر ګول پر وړاندې ماتې ورکړه او له افغانستان وروسته د ګډونوالو لوبډلو په کتار کې د سږ کال په دویم پړاو مرکزي اسیا ۱۵ کلنو سیالیو کې پنځم او ترکمنستان بیا وروستی شپږم مقام ترلاسه کړ.
یادې سیالۍ د نږدې دوو اوونیو لهپاره د ازبکستان په پلازمېنې تاشکند فوټبال نړۍوال لوبغالي کې وشوې چې افغان ۱۵ کلنې فوټبال ملي لوبډلې پهکې د خپل تېرکال اتلولۍ په ساتلو کې پاتې راغله.
