.jpg)
د سږکال ۲۱م پړاو فوټبال نړۍوال جام سیالیو څخه د اسپانیې په حذف کېدو سره د یاد هېواد فوټبال ملي لوبډلې خپل مشهور لوبغاړی او پخوانی کپتان اندریس انییسټا هم له لاسه ورکړ.
د اسپانیې لهپاره د ۲۰۱۰ کال فوټبال نړۍوال جام (فاینل) کې ګول وهلونکی او اتل لوبغاړی ۳۴ کلن انییسټا د وروستي ځل لهپاره بېګا شپه د روسیې خلاف فوټبال سیالۍ د بدیل لوبغاړي په توګه میدان ته ښکته شو.
د اسپانیې او روسیې ترمنځ لوبه د قانوني او اضافه وخت سره ـ سره په یو ـ یو ګول مساوي شوه خو په پنلټي شوټونو کې ۴ د ۳ ګولونو په وړاندې کوربه روسیې بریا خپله کړه، د لومړي ځل لهپاره د فوټبال نړۍوال جام (کوارټرفاینل) ته ورسېد او د ۲۰۱۰ کال اتله اسپانیه یې حذف کړه.
د یادونې وړ ده چې انییسټا په ۱۳۱ نړۍوالو سیالیو کې د خپل هېواد فوټبال ملي لوبډلې په ګټه ولوبید، ټولټال یې ۱۳ ګولونه ووهل چې وروستی نړۍوال ګول یې د روسیې خلاف په پنلټي شوټ سره ترسره کړ.
انییسټا د اسپانیې د ماتې او د نړۍوال فوټبال پرېښودو وروسته رسنیو سره په خبرو کې ویلي دي، دا یې د فوټبال کیریر ترټولو خواشینوونکې ورځ ده او زیاتره وخت لوبغاړی هغه څه نشي ترلاسه کولای چې خوب یې لیدلی وي.
د یادونې وړ ده چې د اسپانیې فوټبال ملي لوبډلې ترڅنګ اندریس انییسټا د ۲۲ کلونو لهپاره د اسپانوي کلپ بارسلونا لهپاره ولوبید او د سږکال په (می) میاشت کې له جاپاني کلپ ویسل کوبي سره یوځای شو.
.jpg)
د اسپانیې فوټبال مشر فرنینډو په خپلو خبرو کې اندریس انییسټا د خپل فوټبال تاریخ یو له سترو لوبغاړو یاد کړی دی او د اسپانیې فوټبال لهپاره یې د نوموړي د لاسته راوړنو مننه کړې ده.
د یادونې ده چې روسیه د سږکال په فوټبال نړۍوال جام سیالیو کې د ګډون کوونکیو ۳۲ لوبډلو په کتار کې ترټولو ښکته ۷۰ مقام لري خو د ۲۰۱۰ کال فوټبال نړۍوال جام اتله اسپانیې بیا ۱۰ مقام درلود چې له ماتې سره مخ شوه.
دغهراز د فوټبال نړۍوال جام سیالیو د بېګا شپې په دویمه یو پر ۱۶م پړاو (پري کوارټرفاینل) لوبه کې د کروشیا او ډنمارک سیالۍ هم د قانوني او اضافه وخت وروسته په یو ـ یو ګول مساوي شوه خو کروشیا په پنلټي شوټونو کې ۳ د ۲ ګولونو پر وړاندې ماتې ورکړه او د ۸ غوره لوبډلو پړاو ته ورسید.
کروشیا چې په ۱۹۹۸ کال فوټبال نړۍوال جام کې یې دریم مقام ترلاسه کړی و د ۲۰ کلن انتظار وروسته د فوټبال نړۍوال جام دریم پړاو(کوارټرفاینل) پړاو ته ورسید.
د روان فوټبال نړۍوال جام سیالیو په دوام نن ماښام ۶ نیمې بجې لومړۍ لوبه کې برازیل له مکسیکو سره او د شپې ۱۰ نیمې بجې به بلجیم له جاپان سره سیالۍ (سیمي فاینل) ته د رسېدو لهپاره سیالۍ وکړي.
