د شاوخوا دوو کلونو په موده کې د ولسمشرۍ ماڼۍ لهپاره څو ویاندویان معرفي شول، خو له لنډې کاري مودې وروسته یو پر بل پسې پر لوړو حکومتي دندو وګومارل شول.
دې چارې پوښتنه را ټوکولې، چې ایا د ارګ مطبوعاتي دفتر لوړو حکومتي څوکیو له پاره د ازموینې ځای دی؟
کتونکي په دې اند دي، چې ولسمشر محمد اشرف غني د یوې ځانګړې کړنلارې له مخې د خپل ټيم د ځای پرځای کولو په هڅه کې دی.
مدني فعال سمیع دره يي وايي، ارګ په حکومتي څوکیو د وړ کسانو ګومارلو پر ځای خپل ټیم ګوماري.
د نوموړي پر خبره، لومړی لږې پېژندل شوې څېرې د ارګ ویاندویانو په توګه معرفي کېږي اوبیا لوړو دولتي بستونو ته معرفي کېږي.
د پوهنتون استاد حکیم صابر هم وايي، چې د ارګ دا ډول سلیقوي او شخصي ګومارنې ډیموکراسي تر پوښتنې لاندې راولي.
خو د ولسمشرۍ ماڼۍ د ویاند مرستیال شاه حسین مرتضوي وايي، هر څوک د وړتیا له مخې ارګ ته راځي او له دغه ځایه پر نورو لوړ ځایونو ګومارل کېږي.
تازه د ولسمشر ویاند محمد هارون چخانسوري د چارو په اداره کې د دولت د سمون د چارو مرستیال په توګه ټاکل شوی دی.
له دې مخکې هم د ارګ ځینې ویاندویان، د ملي امنیت په لوی ریاست او په ملګرو ملتونو کې په لوړو څوکیو ټاکل شوي او یو یې په امریکا کې د افغانستان د سفیر په توګه کار کوي.
