د اختر په شپو او ورځو کې په هرات او کندهار ولایتونو کې د ترافیکي پېښو له امله ۳ تنه وژل شوي دي او له ۲۷۳ تنو زیات ټپیان شوي دي.
د هرات حوزوي روغتون ویاند محمد رفیق شیرزي سلام وطندار ته وویل، چې د اختر په شپو او ورځو کې د ترافیکي پېښو له امله په دې ولایت ۲ تنه وژل شوي او ۱۶۹ نور ټپیان شوي دي.
شیرزی وايي، په دې ولایت کې د سږکال له پيله تراوسه د ترافیکي پېښو له امله ۱۵ تنه وژل شوي دي او له ۱۰۰۰ زیات کسان په کې ټپيان شوي دي.
د هرات حوزوي روغتون د مسوولینو په خبره، د اختر شپو او ورځو کې په واټونو کې د نښتو له امله ۶۵ تنه ټپي شوي ځوانان او کمکي ځوانان روغتون ته د درملنې لهپاره وروړل شوي دي.
دغه راز د کندهار ولایت حوزوي روغتون سرطبیب داکټر محمد قاسم وايي، د اختر پرمهال د ترافیکي پېښو له کبله یو کس وژل شوي او ۱۰۴ تنه ټپیان شوي دي.
د ډاکټر محمد قاسم په وینا، روغتون ته د وروړل شویو کسانو له ډلې ۴۲ تنه ماشومان، ۷ مېرمنې او ۵۶ نارینه دي، چې له دې شمېره د ۱۲ تنو روغتیايي حالت د اندېښنې وړ دی.
زیاتره دغه پېښې په کندهار ښار او ولسوالیو کې د موټر سایکل چلولو له کبله رامنځته شوي دي.
ډاکټر قاسم چټک تګ او د ترافیکي قوانینو نه مراعتول د دې پېښو اصلي لامل بولي.
د کندهار یو شمېر اوسېدونکي د دې ولایت د ترافیکو له مدیریته غواړي، چې له ۱۸ کلونو کم عمره او هغو کسانو ته د موټر چلولو اجازه ورنه کړي، چې لېسنس نه لري.
د کندهار ولایت د ترافیکو مدیر محمد الله خان له کورنیو غواړي، خپل اولادونو ته چې له ۱۸ کلونو کم عمره دي او یا هم لېسنس نه لري د موټر چلولو اجازه ورنه کړي.
د دې ولایت د ترافیکو مسوولین وايي، د لېسنس نه لرونکو او له ۱۸ کلونو د کم عمره کسانو د موټر چلولو مخنیوی له امله د تېر کال په پرتله سږ کال په دې ولایت کې د ترافیکي پېښو ګراف راټیټ شوی دی.
