د ابو‌ظبي غونډه؛ پر اوربند او کورنیو مسایلو هېڅ بحث شوی نه‌دی

واشنګټن ټایمز ورځپاڼې د طالبانو د ویاند له قوله لیکلي چې د دوی استازیو له خلیلزاد سره په ابوظبي کې د اوربند په اړه هېڅ بحث کړی نه‌دی.

د طالبانو ویاند د خبرو پر بنسټ، له افغانستانه د بهرنیو ځواکونو وتل، د طالبان بندیانو خوشې کېدل او امنیتي ځواکونو د عملیاتو درول په دغې غونډې کې د بحث اصلي موضوعات وو.

د واشنګټن ټایمز ورځپاڼې د مالوماتو له مخې، د حقاني شبکې درې غړیو حفیظ یحیی، سعدالله حماس او ډاکټر فقیر په دغو خبرو اترو کې ګډون درلود.

د طالبانو ویاند دغې ورځپاڼې ته ویلي چې په یاد غونډه کې د افغانستان هېڅ کورنۍ موضوع یاده شوې نه‌ده او «دغه ډله د افغانستان د کورنیو چارو په اړه د هېچا مشورې ته اړتیا نه‌لري.»

زلمي خلیلزاد هم په یوه ټویټ کې د متحده ایالاتو غونډه ګټوره بللې ده.

که څه هم د طالبانو استازيو د اماراتو په غونډه کې له افغان دولت سره له مخامخ لیدلو ډډه کړې، خو په کابل کې د امریکا سفارت یوه ویاند سلام‌وطندار ته وویل چې د ابوظبي په غونډې کې د زلمي خلیلزاد ګډون د افغان جګړې پای ته رسولو او د سولې خبرو اترو له‌پاره د اسانتیا برابرولو برخه کې د امریکا متحده ایالاتو د هڅو یوه برخه ده. د نوموړي په وینا، امریکا تل ټینګار کړی چې په افغانستان کې روانه جګړه هاغه مهال پای مومي چې افغانان په خپلو کې یوې سیاسي هوکړې ته ورسېږي.

د امریکا سفارت ویاند د افغان سولې له‌پاره د خبرو اترو زمینې برابرولو برخه کې د پاکستان په اړه وویل، د امریکا متحده ایالات د افغان سولې پرمختګ او د جنوبي اسیا هېوادونو ترمنځ د اړیکو ښه والي له‌پاره د پاکستان هر ډول اقدام ستايي.

زلمي خلیلزاد د روان کال د سپټمبر میاشتې راهیسې د افغان حکومت او وسله‌والو طالبانو ترمنځ د سولې خبرو اترو د پیل له‌پاره د بستر جوړولو په اړه څو ځله له دواړو لوریو سره لیدلي دي.

زلمي خلیلزاد او د طالبانو استازیو درې ورځې د متحده اماراتو په پلازمینې ابوظبي کې پر افغان سولې مخامخ خبرې وکړې. په دغو خبرو اترو کې په قطر کې د طالبانو سیاسي دفتر استازیو، د دغې ډلې نظامي استازیو، د امریکا، پاکستان، عربستان او اماراتو استازیو ګډونن کړی و.