مملکت دین عالم‌لریدن بیرقطاری، قورال‌لی طالب‌لردن مبارک روزه آیی‌گه حرمت قایل بولیب و بو آی جریانیده زوره‌وانلیک و اوروش‌دن قول تارتیش‌لرینی ایسته‌گن‌لر. دین عالم‌لری‌نینگ ایشانچی‌گه کوره، روزه آیی برکت، رحمت، عبادت، انسان‌لرگه یاردم بیریش و هرقنده‌ی زوره‌وانلیک‌دن قول تارتیش آیی بولیب و بو آی‌ده قورال‌دن وازکیچیش کیره‌ک.
دین عالم‌لریدن بیری کمال‌الدین حامدنینگ سلام‌وطندارگه ایتیشیچه، روزه تینگری رحمتی و بو آی‌ده قان توکیش اسلام دینی‌گه قرشی کته جنایت سنله‌دی. جناب حامدگه کوره، اسلام دینی‌نینگ پیامی بوتون دنیا خلقی‌گه تینچلیک و دوست‌لیک دیر.
اوشبو دین عالمی، برچه قورال‌لی طالب‌لر و جنگری گروه‌لرن دین پیامی‌گه حرمت قایل بولیب، خلق‌گه قووانچ کیلتیره‌آلمه‌گن حال‌ده، خلق‌نی قیین‌چیلیک‌که دوچ کیلتیرمس‌لرینی سوره‌دی.
دین عالم‌لریدن باشقه بیری مولوی جلاالدین حنفی، روزه آیی‌ده گناه‌سیز کیشی‌لرنینگ اولدیریشی‌نی کته گناه بیلیب ایتیشیچه، هیچ کیم‌گه جنسی زوره‌وانلیک، باش کیسیش و یول توسیش‌گه حق بیریلمه‌گن؛ اینیقسه انسان دوست‌لیک و یخشی‌لیک دیب اتلگن روزه آیی‌ده.
شونینگ‌دیک، بیرلشگن ملت‌لر تشکیلاتی، بیر پیام ترقه‌تیب افغانستان‌ده‌گی برچه اوروش تامان‌لریدن روزه آیی جریانیده توقنه‌شوو و زوره‌وانلیک‌دن قول تارتیش‌لرینی سوره‌گن. افغانستان بوییچه بیرلشگن ملت‌لر تشکیلاتی اورین باسرلیک دفتری (یوناما)نینگ مطبوعاتی اعلامیه‌سیده کیلیشیچه، افغانستان بوییچه مذکور تشکیلات‌نینگ خاص نماینده‌سی نیکولاس هیسم، اوروش تامان‌لریدن روزه آیی‌گه حرمت قایل بولیب و مملکت یشاوچی‌لری‌نینگ بیر آی جریانیده تینچ قوییش‌لرینی سوره‌گن.
