بوگون «شنبه» ایرته‌لب تخار ولایتی‌نینگ دشت‌قلعه تومنی یشاوچیلریدن یوزلرچه‌سی، مذکور تومن‌نینگ ولسوال‌لیگی و شهردارلیگی برابریده توپله‌نیب اعتراض بیلدیرگن‌لر و شونینگدیک، دولتی ییرلرده ناقانونی شکلده اوی و جای قوریلیش آلدی آلینیشی‌نی سوره‌گن‌لر.
اعتراضچی‌لرنینگ ایتیشیچه، شهر رواجلنتیریش منطقه‌سی بولگن 240 جریب ییرنی ناقانونی شکلده ترقه‌تگن‌لر تانیلیب و جزالنتیریلیشی کیره‌ک.
شونینگدیک، اولر دشت‌قلعه تومنی‌نینگ شهرداری، ولسوالی و اجرایه مدیری وظیفه‌لریدن چیکلنتیریلیب و جزالنتیریلیش‌لرینی طلب قیلگن‌لر.
اعتراضچی‌لردن بیری عظیم سروری‌نینگ ایتیشیچه، مسؤوللر اولرنینگ ایستک‌لریگه دقت قیلمه‌گن صورتده، اولر 6 تومن‌نینگ قتناو یوللرینی باغله‌یدی.
شونینگدیک، نیچه کون آلدین دشت‌قلعه تومنی‌نینگ اهالیسی ناراضیلیک بیلدیرگنی باعث، تخار ولایتی‌نینگ محلی حکومتی ییر غصب قیلینگن موضوعی تیکشیریلیشی اوچون مذکور تومن گه بیر هیأت یوباردی؛ بیراق اوشبو هیأت نینگ ایشی‌نی نتیجه‌سی حاضرگچه اهالی بیلن شریک قیلینمه‌گن.
باشقه تاماندن، دولتی ییرلرنی ناقانونی شکلده ساتیش گه عیب‌لنگن دشت‌قلعه شهرداری سید خیرالدین، نیچه کون آلدین تخار ولایتی‌نینگ جنایی جرم‌لرگه قرشی کوره‌ش اداره‌سی تامانیدن قولگه آلینگن ایدی و بیر کیچه‌دن سونگ، قماقدن قوییب یوباریلیب و وظیفه‌سیگه قیتدی.
تخار حاکمی فضل‌الله مجددی‌نینگ ایتیشیچه، اوشبو موضوع اوچون تعیین ایتیلگن هیأت حاضرگچه دوسیه اوستیگه ایشله‌یدی و شهر رواجلنتیریش منطقه ییرلرینی ناقانونی شکلده ساتگن‌لر تیزلیک‌که قولگه آلینه‌دیلر.
دشت‌قلعه تومنی یشاوچیلری‌نینگ ایتیشیچه، مذکور تومن‌نینگ ولسوالی عبدالمناف فیضی، شهرداری سید خیرالدین، اجراییه مدیری، شهردارلیک انجنیرلری و تخار محلی حکومت باشلیغ‌لریدن بیرقطاری، بیر-بیراوی بیلن بیرلیگیب شهر رواجلنتیریش منطقه‌لرنی ساتگن‌لر.
شونینگدیک، اولر تخار محلی حکومتی تامانیدن دشت‌قلعه تومنی گه یوباریلگن هیأت‌نی ییر غصبی گه قولی بارلیک‌که عیب‌لیدی.
