د افغانستان د راډیوګانو او ټلوېزیونونو ټولنه او د رسنیو او خبریالانو یو شمېر ملاتړي بنسټونه نن کابل کې د یوې خبري غوڼډې پر مهال، د تروریستي پېښو له جریانه د رسنیو په ژوندیو خپرونو محدودیت او بندیز لګول، د قانون خلاف او یو ډول سانسور بولي.
د افغانستان د راډیوګانو او ټلوېزیونونو ټولنې مشر مولانا عبدالله وايي، د حکومت او رسنیو د مصونیت تامینولو ګډې کمېټې، د تروریستي پېښو پوښښ پر مهال د امنیتي ځواکونو او خبریالانو ترمنځ د ژبنۍ او بدني شخړې مخنیوي او خبریالانو سره د ولسمشر او مېرمن رولا غني د ساتونکیو له چلنده د ځانژغورنې په موخه، یوه کړنلاره رامنځته کړې.
د ښاغلي عبدالله د څرګندونو پر بنسټ، د دې کړنلارې څلورمې مادې درېیم جز کې راغلي: «د خبریالانو له لوري په ژوندۍ بڼه د تصویرونو خپراوی به د امنیتي ځواکونو یا د ملکيانو ژوند چې تروریستي پېښې سره مخ شوی، له خطر سره مخ کړي، باید د داسې تصویرونو له مستقیم خپراوي چې د امنیتي ځواکونو عملیات ښيي؛ ډډه وشي.»
د افغانستان راډیوګانو او ټلوېزیونونو ټولنې مشر زیاتوي، اطلاعاتو او کلتور وزارت کې د رسنیو له استازیو سره د ژوندیو رسنیو په خپرونو محدودیت لګولو په موخه غونډو کې د رسنیو مسوولانو د کړنلارې دغه ماده سانسور شوې وبلله او د هغې مخالفت یې وکړ؛ خو د سرور دانش په مشرۍ ګډې کمېټې، د جګړې او تروریستي پېښو خبري پوښښ کړنلارې په نوم دغه طرزالعمل تصویب کړ.
د ده په خبره، د دې کړنلارې د ۴مې مادې ۳ جز د اساسي قانون له ۳۴ او د ټولیزو رسنیو قانون له ۴مې مادې سره ښکاره په ټکر کې دی.
ښاغلی عبدالله د دې کړنلارې د ۴مې مادې لهمنځه وړلو غوښتنه کوي، اويي چې حکومت د داسې کړنلارو په تصویبولو سره د خبریالانو او رسنیو روحیه کمزورې کوي.
د افغانستان د راډیوګانو او ټلوېزیونونو ټولنې مشر په وینا، د حکومت او رسنیو د مصونیت تامینولو ګډه کمېټه باید د خبریالانو او رسنیو لهپاره اسانتیاوې برابرې کړي، نه محدودیت او بندیزونه.
خو د ولسمشمرۍ ماڼۍ د ویاندوۍ دفتر سرپرست شاهحسین مرتضوي د دې کړنلارې د تصویبېدلو موخه د تروریستي پېښو په پوښښ کې د خبریالانو ځاني خوندیتوب بولي.
دی زیاتوي، د کړنلارې موخه دا ده چې د تروریستي پېښو پر مهال د خبریالانو امنیت تامین شي.
ښاغلی مرتضوي وايي، دغه کړنلاره د رسنیو فدراسیون او د خبریالانو ملاتړو بنسټونو په همکارۍ تدوین شوې او د خبریالانو ملاتړو بنسټونو غړي باید د کړنلارې په اړه د خپلو معلوماتو بشپړولو لهپاره د حکومت او رسنیو مصونیت تامینولو ګډې کمېټې ناستو کې حضور ولري.
پر دې ټولو سربېره د خبریالانو مدافع بنسټونو مسوولان وايي، د خبریالانو پر وړاندې بریدونه زیات شوي؛ خو حکومت د خبریالانو امنیت تامینولو لهپاره هېڅ ډول طرحه نهلري.
د دې بنسټونو مسوولانو په وینا، حکومت لا هم د ثور ۱۰مې تروریستي پېښې په اړه چې ۹ خبریالان په کې ووژل شول، معلومات نهدي وړاندې کړي.
