تورت آیدن بیری بغلان دهنه غوری تومنی نینگ عسکرلری مرکز بیلن تومن یولی یاپیقلیگی سبب آیلیکلرینی قولگه کیلتیرالمهگنلر و اوروش میدانلریده آچ اوروشهدیلر.
دندغوری منطقهسی طالبلر تصرفیگه اوتیشی بیلن دهنه غوری تومنی نینگ مرکز بیلن باریش کیلیش یولی مرکز دولت ملازملری یوزیگه یاپیلگن ایدی.
مذکور تومنده قمراوگه قالگن عسکرلردن محمدعثمان و زبیر احمدنینگ سلاموطندارگه ایتیشلریچه، طالبلر دهنه غوریگه هجوم قیلگن صورتده، امنیتی کوچلر مذکور تومنده قمراوگه قالگن عسکرلرگه یاردم بیریشه آلمیدیلر.
بو عسکرلر مرکزی دولتدن دهنه غوری تومنیده عملیات اوتکزیب، مرکز بیلن تومن یولینی اهالی یوزیگه آچیلیشینی ایستیدیلر.
بغلان ولایتی کینگش اعضاسی شاهجهان ایوبی هم اوشبو تومن یولی یاپیق قالیشی اهالینی کوپلب قیینچیلیکلر بیلن روپهره قیلگن دیدی.
بغلان والیسی عبدالستار بارز، اوشنده یکه دهنه غوری تومنیدهگی عسکرلر قیینچیلیکلرینی قبول قیلهدی، اما اونینگ ایتیشیچه، هوا آرقهلی اوروش جهازلری و ییگولیک یاردملری امنیتی کوچلرگه یوباریلگن و بو عسکرلر «جدی قیینچیلیکلر بیلن روپهره ایمسلر».
جناب بارزگه کوره، دهنه غوری تومنی طالبلر بارلیگیدن پاک بولیش اوچون تیزلیکده یوکسک عملیات یولگه قویلهدی.
شوپیتده بغلان محلی رسمیلری ولایتده ییریک حربی عملیات یولگه قویلیشیدن خبر بیرهدی که بوندن آلدین بغلان اهالیسی حربی عملیاتلر نتیجه سیزلیگیدن انتقاد قیلیب ایتیشلریچه، عملیاتلر یکونله گن زمان پاک بولگن منطقهلرده طالبلر دوباره کیلهدی.
