بوگون ایرتلب بامیان ولایتی نینگ ملی مجلس اعضاسی فکوری بهشتی، پارتلش نتجهسیده یرهلندی. پارتلش کابل شهرینینگ آلتینچی خوفسیزلیک حوزهسیده یوز بیرگن.
ایرتلب پارلمان تامان حرکتده بولگن جناب بهشتی نینگ موتری کابل نینگ دشتبرچی منطقهسیده پارتلشگه روپه ره بولگن. واقعهده بهشتی تَن جراحتی آلگن و بیر تَن قوریقچیسی ایسه قربان بولگنی ایتیلهدی.
حادثه مسوولیتینی هلیگچه بیرار گروه یا شخص ذمهسیگه آلگنیچه یوق.
اخیرگی نیچه آی ایچیده کابلده هجوم آستیگه آلینگن بو پارلمان نینگ اوچینچی اعضاسی سنهلهدی.
اوتگن هفته چهارشنبه کونی هلمند ولایتی نینگ ولسی جرگه اعضاسی معلم میرولی نینگ اوییگه قوراللنگن کیشیلر باستیریب کیریب جناب میرولی عایلهسی نینگ 7 اعضاسینی قربان ایتگن ایدی. قربانلر ایچیده جناب میرولی نینگ ایکّی نبیرهسی و عبدالله بارکزینینگ اوغلی بارلیگی تیلگه آلینگن ایدی.
بوندن چمهسی تورت آی آلدین کابل خلقی نینگ نمایندهسی شیرولی وردک کابل شهرینینگ قمبر تورت یولیده جایلیشگن یشش اویی یقینیده اوزاقدن باشقریله دیگن ماین پارتلهتیشی عاقبتیده حیاتدن کوز یومگن ایدی.
