د افغانستان په ځینو ولایتونو کې د القاعدې په مهمو غړو د امریکې هوايي ګوزارونو خلکو ته پوښتنې پيداکړي، چې ایا اوس هم القاعده په افغانستان کې حضور لري او لوی ګواښ دی، چې د امریکا له خوا په نښه کېږي؟
په دې اړه د ملي دفاع وزارت او د پوځي چارو تحلیلګران ویشلي نظرونه لري.
د ملي دفاع وزارت ویاند دولت وزیري له سلام وطندار سره په مرکه کې وویل، چې اوسمهال په افغانستان کې القاعده فعال فزیکي موجودیت نه لري او د پردې ترشا له طالبانو، داعش، لښکر جنګوي او لښکر طیبه سره په افغانستان کې مرستې کوي.
د وزیري پر خبره، د القاعدې ډله پياوړې مالي سرچینې لري او له نورو ترهګرو ډلو سره د دوی همکاري ګواښونکې ده.
د ملي دفاع وزارت ویاند زیاتوي، د القاعدې شبکې کسان د کونړ پر پوله، پکتیکا او ننګرهار ولایتونو کې له طالبانو سره مرستې کوي، چې د پېژندلو سره سم به د امنیتي ځواکونو له خوا له منځه یوړل شي.
دولت وزیري په داسې حال کې دغه څرګندونې کوی، چې څه موده مخکې د القاعدې ډلې قوماندان فاروق القحطاني د افغانستان په شمال او د دې ډلې یو بل کلیدي غړی په کونړ ولایت کې د امریکايي ځواکونو په هوايي برید کې ووژل شو.
د سیاسي چارو شنونکی فردوس کاوش په دې اړه وايي، چې اوسم هم په افغانستان کې القاعده موجوده ده، خو د دغې ډلې خوځښت ګواښونکی نه دی.
د ده پر وینا، د طالبانو له ډلې سره القاعده نږدې همکاري کوي او په ډېرو سیمو کې له طالبانو سره په لیکو کې یوه، دوه کسان د القاعدې موجود دي.
پوځي شنونکی عزیزالله په دې اند دی، چې د القاعدې په شمول ټولې ترهګرې ډلې او طالبان له یوې سرچینې ملاتړ کېږي او په ګډه یې افغانستان کې ورانکاريوته لاس یو کړی دی.
د عزیز پر وینا، په بېلابېلو نومونو په افغانستان کې د ترهګرو ډلو کړنې یو ډول دي.
