د افغانستان د ملي دفاع وزارت چارواکي وايي، چې مسکو د وسلهوالو طالبانو سره د مرستو پر ځای د افغانانو له قانوني حکومت سره باید اوږه ورکړي.
د یاد وزارت ویاند جنرال دولت وزیري په افغانستان کې د غوڅ ملاتړ ماموریت ویاند سره ګډې خبري غوندې ته زیاته کړه، چې له طالبانو سره مرستې او اړیکې روسیې ته هیڅ ګټه نه لري.
دولت وزیري په افغانستان کې د غوڅ ملاتړ ماموریت ویاند بیل سیلوان سره د پنجشبې ورځ کابل کې خبري غونډې ته وویل، چې هر حکومت ایران، روسیه، ګاونډي او د سیمې هیوادونه چې غواړي له ترهګرۍ سره مبارزه وکړي باید د افغانستان له قانوني حکومت سره مرسته وکړي ځکه په دې برخه کې يي زیاته قرباني ورکړې.
دا داسې مهال دی چې په دې ورستیو کې د روسیې مرستیال لوی درستیز قبایلي سیمې میرام شاه ته تللي وو چې ډېرې پوښتنې یې راپورته کړي.
خبري غونډې ته د غوڅ ملاټر ماموریت ویاند بیل سیلوان وویل، چې په افغانستان کې له ترهګرۍ سره مبارزې ته ژمن دي.
سیلوان زیاته کړه، له طالبانو ملاټر په سیمه او افغانستان کې د هیچا په ګټه نه دی او هر ډول اړیکې چې وي باید د افغانستان له قانوني حکومت سره وي.
له طالبانو د روسیې ملاتړ ښیي چې افغانستان یو ځل بیا د نړۍ زبرځواکونو د سیالۍ پر ډګر د بدلېدو په حال کې دی.
