تخار ولایتینینگ درقد تومنی کمیده بیر یریم آی آلدین طالبلر نظارتیگه اوتدی و حاضر اوشبو منطقه حاکمیتینی قولگه آلگن کیشی، اوزینی اسلامی اماراتگه تیگیشلی بیلیب و معلوم قیلیشیچه، بوندن کیین، درقدده الله حکمی عملگه آشیریلهدی.
تخار پولیس قومندانی جنرال نورمحمد حکیمینینگ سلاموطندارگه ایتیشیچه، اوشبو چیگرهیی تومنده، انسان، قورال و مخدره ماده قاچاقچیلری انچه ییللردن بویان فعالیت قیلهدی و ناقانونی تَوَرلردن یخشی صورتده فایدهلنیب و کوپ پول قولگه کیریتهدی.
بیر هفته آلدین، امنیتی کوچلر بیر عملیات نتیجهسیده، درقد تومنینینگ کوپینچه قسمتلرینی نظارتگه آلگن ایدی، بیراق عملیات انچه پیتدن کیین توختهتیلدی. طالبلر ایکی ییلدن بویان مذکور تومننی قولگه کیریتیش خصوصیده، سعی و حرکت قیلهدی.
جنرال حکیمینینگ ایتیشیچه، طالبلر قاچاقچیلر یاردمی بیلن مذکور تومننی نظارتگه آلگن. اوشبو تومن حاضر اورته آسیا جنگریلری و خودکش هجومچی تشکیلاتلرینینگ تینچ اورنیگه اوزگرگن.
تخار پولیس قومندانینینگ ایتیشیچه، درقد تومنیده ناقانونی حرکتلر عادی حالت و مدنیتگه اوزگرگن و حاضر اوشبو تومن یشاوچیلریدن یریمی ناقانونی یوللردن فایدهلنهدی. انسان، مخدره ماده قاچاقی، جنایی جرملر و اورمانلرنی کیسیش مذکور تومنده عادی مسلک و فعالیتلرگه اوزگرگن.
طالبلر، اوشبو تومنده اوز مرکزلرینی قوریب، ماین توزهتهدیگن ایش خانهلر ایجاد ایتیب و اورته آسیادن قاچگن ناراضچیلرنی بو گروهگه قوشیلیش اوچون چقیریشگه قصد قیلگن.
تخار والیسی داکتر یاسین ضیانینگ ایتیشیچه، ییترلیچه امکانیت بولمهگنی و منطقهگه اوتیش قیینچیلیگی باعث، خوفسیزلیک کوچلرینینگ عملیاتی قیینچیلیککه روپهره بولهدی.
طالبلر ایکینچیلر و کیچیک ییردارلردن، عشر و زکات آتیده پول توپلب و اوز خزانهسیگه کوپهیتیرهدی. محل رسمیلرنینگ ایتیشیچه، طالبلر قولگه کیریتگن پوللریدن قورال و حربی جهاز ساتیب آلهدی.
یشاوچیلر طالبلر و امنیتی کوچلردن شکایت قیلیب ایتیشیچه، ایکی گروه هم محل اهالیسینی آزار بیریب و حقلرینی ایاق آستی قیلهدی.
درقد ارالی کمیده 50 مینگ کیشی جمعیت بیلن تخار ولایتینینگ اوزاقده جایلشگن تومنلریدن بیری دیر. اوشبو تومننی هیچ بیر قوریق یولی یوق و تاجیکستان مملکتی بیلن اورمانلر ارا اوزون چیگره داش بولگن.
