د کانونو او پېټرولیم وزیر داود شاه سبا مشرانو جرګې ته په معلوماتو د ورکولو پرمهال وویل، چې په نږدې راتلونکې کې به د ټاپي پروژې د امنیت چارې او د ماین پاکونو پروسه پیل شي.
سبا زیاته کړه، چې په راروانو څو ورځو کې به د دې سترې اقتصادي پروژې مدیریتي کارونه شروع شي او د اپريل په میاشت کې به د ترکمنستان څخه به د ګازو د نل لیکې د غځېدلو هغه لار، چې په افغانستان کې تېرېږي؛ له هر ډول چاودېدونکو توکو نه پاکه کړي.
د کانونو او پېترولیم وزیر وویل، په دې پروژه کې به په زرګونه افغانان په کار وګومارل شي.
ده سناتورانو ته ډاډ ورکړ، چې د ګازو د نل لیکې د تېرېدلو سیمه یې د فضا له لارې سروې کړې او په راتلونکې کال کې به د ځمکې له لارې هم دغه سروې پیل شي.
په دې پروژه کې به له ۱۰ تر ۱۵ پورې کسان په دندو بوخت شي.
ټاکل شوې ده، چې د ټاپې پروژې به په درې کالو کې بشپړه شي او په ۲۰۲۰ زېږدیز کال کې به د افغانستان له لارې پاکستان او هند ته تېر شي.
د اټکل له مخې پر دغې پروژې شاوخوا لس میلیارده ډالره لکښت راځي، چې د اسیا بانک، نړیوالو شرکتونو او اړوندو هېوادونو له لوري ورکول کېږي.
تمه ده چې افغانستان به یوازې د کال ۴۰۰ میلیونه ډالره د ترانزیت حق اخلي.
۱۷۳۵ کیلومتره دغه اوږد پایپلاین به د افغانستان په خاوره کې د هرات او کندهار له لويې لارې تېر شي.
په لومړي سر کې به افغانستان ته د دغې نل لیکې له لارې د کال دوه میلیارده کیوبیک متره ګاز ورکول کېږي، خو پاکستان او هند، هر یو به جلا جلا ۴۴۰ میلیارده کیوبیک متره ګاز ترلاسه کوي.
