د ولسمشر دویم مرستیال سرور دانش وايي، د هېواد وضعیت ته په کتو، له امریکا سره د افغانستان امنیتي تړون لغوه کولو یا هم ورباندې بیاکتنې په اړه د یوشمېر سیاسیونو او ملي شورا د غړیو هڅې د سترو ملي ګټو خلاف دي.
نوموړي چې نن د محرم لسمې په اړه جوړې شوې غونډې کې خبرې کولې وویل، د مليشورا هر غړی باید د اساسي قانون ۸۱ یمې مادې له مخې د رایې کارولو پرمهال، د هېواد ملي ګټې په پام کې ونیسي.
دانش زیاتوي، یاد کسان د هېواد له اقتصادي او امنیتي وضعیته ناخبره دي او یوازې د عقدو له مخې دا ډول هڅې کوي.
د حکومت اجرایوي رییس عبدالله عبدالله هم د دوشنبې په ورځ د وزیرانو شورا غونډې کې د افغانستان او امریکا ترمنځ پر امنیتي تړون بیاکتنه یا د هغه لغوه کول د هېواد په زیان او د ځینو سیاستوالو شخصي دریځ ګڼلی و.
دا په داسې حال کې ده چې ولسي جرګې د تېرې چهارشنبې ورځې په عمومي غونډې کې له امریکا سره د افغانستان امنیتي تړون د هېواد لهپاره بېګټې بللی و او د رایو په ډېروالي سره یې پرېکړه کړې وه چې پر یاد تړون باید بیاکتنه وشي او یا دې هم لغوه اعلان شي.
بلخوا د پخواني ولسمشر حامد کرزي په ګډون، ځینو سیاسیونو او د جهادي ګوندونو مشرانو په همدې ورځ د صبغتالله مجددي په کور کې غونډه جوړه کړې وه او د رایو په ډېروالي یې د افغانستان او امریکا پر امنیتي تړون د بیاکتنې غوښتنه کړې وه.
