د جوزجان سیمه ییز چارواکي اندېښنه ښيي، چې داعش ډلې په دې ولایت کې خپل وسله وال فعالیتونه پيل کړي دي او له افغان امنیتي ځواکونو سره په جګړه بوخت دي.
د جوزجان د ولایتي شورا غړي خبرداری ورکوي، چې داعش وسله والو د خپل لومړي برید په ترڅ کې د دې ولایت قوشتېپه ولسوالي محاصره کړه، خو وايي، که امنیتي ځواکونه مرستې ته ور ونه لېږل شي؛ دغه ولسوالي سقوطېږي.
د جوزجان د ولایتي شورا غړې حلیمې صدف سلام وطندار سره په خبرو کې وویل، چې د طالبانو ځېنې مشران له داعش ډلې سره یوځای شوي او د دوی د بیرغ لاندې په دې ولایت کې فعالیت کوي.
د اغلې صدف پر وینا، جوزجان، فاریاب او سرپل ته د طالبانو له خوا نومول شوي والیان سره یوځای شوي او د قاري نعمت الله په نوم د یو پاکستاني شېخ پر مشرۍ د داعش په لیکو کې د افغان دولت پر ضد په بریدونو بوخت دي.
د جوزجان والي ویاند محمدرضا غفوري هم په دې ولایت کې د داعش موجودیت تاییدوي، وايي، چې د طالبانو فعالیت اندېښمنوونکی نه دی، ځکه چې پرونی طالب نننی داعش دی.
د غفوري په خبره، چې داعش ډله په جوزجان ولایت کې خپلو لیکو ته وسله وال نیسي؛ خو که د ځپلو له پاره عملیات ونه شي؛ فعالیتونه به یې نور هم زیات شي.
په ورته وخت کې د جوزجان ولایت د امنیې قوماندانۍ د امنیت امر عبدالحفیظ خاشع سلام وطندار ته وویل، چې قاري حکمت له خپلو کسانو سره له داعش سره یوځای شوی او له درېیو ورځو راهیسې د قوشتېپې ولسوالۍ د محاصره کولو هڅه کوي.
د خاشع په خبره، د قاري حکمت ډله ۴۰ تنو ته رسېږي، چې د ځپلو له پاره یې په پیل شویو عملیاتو کې تر اوسه ۶ داعش وسله وال وژل شوي او ۱۰ نور ټپیان دي.
داعش ډلې د لومړي ځل له پاره د افغانستان په جوزجان ولایت کې خپل بیرغ پورته کړ او په دې ولایت کې یې د خپلو عملیاتو د پيل اعلان وکړ.
