داعشیانو په ننګرهار کې د یوې خبرپاڼې په خپرولو سره د نجونو ښوونځیو ادارو او کورنیو ته جدي خبرداری ورکړی چې ښوونځي وتړي او کورنۍ خپلې لوڼې او خویندې ښوونځیو ته پرېنهږدي.
دا خبرپاڼه دوې ورځې مخکې د (یکشنبې) په ورځ خپره شوېده.
د دوی په خبرپاڼه کې په ټینګار سره راغلي چې سر له سبا (پرون) راهیسې به «د سکولر کفري نصاب» ټول پرانیستي ښځینه ښوونځي د دوی د «درنو چاودنو او تندریزو» بریدونو هدف وګرځي.
د خبرپاڼې په حواله، کهچېرې هر څوک د دې خبرداري څخه سرغړونه کوي، د وژل کېدا مسوولیت یې پهخپله غاړه دی.
ورته وخت کې د ننګرهار ولایت د ښوونځيو زدهکوونکي وايي، تېره ورځ ورته په ښوونځیو کې ویل شوي چې سر له ننه یې ښوونځي د داعش ډلې د ممکنه بریدونو له امله رخصت دي او دوی دې نور نه ورځي.
د ننګرهار عالي لېسې دوه تنه شاګردان فیصل او ایمل وايي، د کلنۍ ازموینې لهپاره نن سهار ښوونځي ته ورغلي وو خو ښوونځی یې تړل شوي و.
د دې ولایت د پوهنې رییس حسیب الله شینواری د داعش له لوري پر ښوونځیو د بریدونو احتمال نه ردوي؛ خو وايي، اوس یې یوازې په مرکز جلال اباد ښار کې له دې امله ښوونځي رخصت کړي، چې د زده کوونکیو کلنۍ ازموینې پای ته رسېدلي.
د ننګرهار د والي ویاند عطاالله خوږیاڼي سلاموطندار سره په مرکه کې ویلي، ننګرهار کې د ګرمو سیمو ښوونځي د داعش له وېرې نه، بلکې د کلنیو ازموینو له پای ته رسېدو سره سم رخصت شوي؛ په ورته وخت کې نوموړی دیو لړ ګواښونو هم وېره لري.
تر اوسه د خبرداري دغه لیک د داعش له هېڅ ادرسه په رسمي ډول نه دی تایید شوی؛ خو د یادې ډلې د رسمي نښان او بیرغ لرونکی دغه لیک کې ویل شوي، دوی د نجونو پر ښوونځيو دا بریدونه د بهرنیو او حکومتي ځواکونو د هغو عملیاتو په غبرګون کې کوي، چې د هسکې مېنې په بېلابېلو سیمو کې پکې لسګونه عام خلک وژل شوي.
داعشیان ادعا کوي چې دولتي ځواکونو د ننګرهار د هسکېمېنې په ګورګوري او پاپین سیمو کې په تېرو ۳ ورځو کې له ۱۰۰ ډېرو ماشومانو او زنانهوو ته مرګژوبله اړولې او دا خبرداری د دولتي ځواکونو له لوري د شویو عملیاتو غچ اخېستل بولي.
سلاموطندار د دې خبرپاڼې صحت نهشي ثابتولی.
