د میدان وردګو سیداباد ولسوالۍ سیمه ییز چارواکي او ځایي اوسېدونکي وایې، مخ پټو وسله والو تېره ورځ د (جون په ۲۶مه) د سیداباد تنګي د صوبیانو زیارت لومړی ویجاړ او وروسته یې جنډو ته اور ورته کړ.
د سیداباد ولسوال ډاکتر فضل کریم "مسلم" سلام وطندار سره په خبرو کې وویل، چې د صوبیانو تاریخي زیارت وسله والو په بشپړ ډول ویجاړ کړی دی.
مسلم وایي، چې دا د داعش کار نه دی، بلکې د سیداباد ولسوالۍ د تنګي د طالبانو قومندان سعدالله له خوا شوی دی.
هغه وایې، چې په سیداباد ولسوالۍ کې داعش ډلې په رسمي ډول فعالت نه دی پيل کړی، خو د یو شمېر پلویانو د موجودیت په اړه یې خبرونه خپاره شوي دي.
د صوبیانو زیارت د لوګر او وردګو ولایت د دوو ولسوالیو، بره کي برک او سیداباد ترمنځ په تنګي سیمه کې موقعیت لري.
د بره کي برک ولسوال انجنیر محمد رحیم " امین " سلام وطندار ته وویل، له دې وړاندې هم د بره کي برک ولسوالۍ امنیتي او کشفي اورګانونو ته راپورنه رارسېدلي وو، چې په دې سیمه کې د صوبیانو زیارت سر بېره یو شمېر نور زیارتونه به د داعش له لوري ویجاړ شي.
د سیداباد ولسوالۍ د تنګي سیمې اوسېدونکي حاجي رحمت الله سلام وطندار ته وویل، د صوبیانو زیارت ۱۲۰ کالن تاریخ لري او پر افغانستان سربېره ورته له بېلابېلو هېوادونو نه وګړي د احترام لپاره راځي.
رحمت الله زیاته کړه، دا کار د وسله والو طالبانو نه، بلکې د داعش پلویانو کار دی.
د دغې ولسوالۍ یو موټر چلوونکی رحمان الله بیا وایې، چې تېره ورځ یې د شفا غوښتلو لپاره دغه زیارت ته ناروغ یوړ، خو چې کله ور رسېد؛ د زیارت نښې نښانې نه لیدل کېدلې او له بېخه ویجاړ شوی و.
نوموړي وویل، هره ورځ به د افغانستان له بېلابېلو ولایتونو څخه له ۶۰ تر ۱۰۰ تنو پورې کسان د احترام لپاره دغه زیارت ته راتلل.
دا په داسې حال کې ده، چې شاوخوا درې میاشتې وړاندې هم د لوګر ولایت په څرخ ولسوالۍ کې د مولاعلي په نوم مشهور زیارت د داعش پلویانو له خوا ویجاړ شوی و.
