د جوزجان په درزاب او قوشتېپې ولسوالیو کې به تر ۲ کلونو وروسته نږدې ۳۰ زره ماشومانو ته د پولیو واکسین ورکړل شي.
د جوزجان سیمهییز مسوولان وايي، له دولت سره د داعش ډلې ۲۵۰ جنګیالیو تر یوځای کېدو وروسته دا لومړی ځل دی چې په درزاب او قوشتېپې ولسوالیو کې د پولیو واکسین کېږي.
د جوزجان د عامې روغتیا رییس حفیظالله جمشېدي د پولیو واکسین د مني پړاو د پیل په مراسمو کې وویل، په دې پړاو کې به د جوزجان په مرکز او ولسوالیو کې ۱۶۰ زره ماشومان چې له ۵ کلونو کم عمر ولري، واکسین شي.
په همدې حال کې د جوزجان والي لطفالله عزیزي په یادو مراسمو کې وویل، تر هغې وروسته چې د داعش ډلې جنګیالي د حکومت د سولې له پروسې سره یوځای شول، ټاکل شوې ۴ روغتیايي مرکزونه هم په درزاب او قوشتېپې ولسوالیو کې پرانستل شي.
تېره اوونۍ د داعش ډلې قوماندانانو په ګډون، د دې ډلې شاوخوا ۲ سوه جنګیالي د جوزجان په درزاب او قوشتېپې ولسوالیو کې امینتي ځواکونو ته تسلیم شول. د چارواکیو په وینا، په دغو کسانو کې ښځې هم شته.
