داعشیان د سوريې پناغوښتونکو په ډله کې جرمني ته ورغلي

د جرمني هېواد استخباراتي اداره (بي، اف، وي) وايي، داسې اسناد یې تر لاسه کړي دي، چې د سوريې پناغوښتونکو په ډله کې د داعش وسله والې ډلې کسان جرمني ته ورغلي دي.

د دغې ادارې رییس هانس جورج میسن وویل، دوی له سلو زیات داسې اسناد موندلي دي، چې د پناغوښتونکو په ډله کې د داعش وسله والې ډلې کسان په پټه یې هېواد ته وردننه شوي دي.

د دغه خبر له خپرولو مخکې د جرمني هېواد استخباراتي ادارې د الجزایر هېواد دوه تنه نارینه او یوه ښځه د داعش ډلې سره د اړیکو درلودلو په تور ونیول.

د یادو کسانو له نیولو وروسته د جرمني استخباراتي ادارې د دغه هېواد په هانوور او اتندورن پنډغاليو کې د داعش ډلې له شکمنو فعالیتونو خبر ورکړ.

اروپايي هېوادونو ته د پناغوښتونکو ورتګ په دغو هېوادونو کې د جرمونو او د ترهګرۍ پېښو د زیاتېدو په اړه اندېښنې زیاتې شوي دي.

د جرمني هېواد لومړۍ وزیره انګلا مرکل د پناغوښتونکو په اړه د “پولو ازاد” پرېښودلو د سیاست له امله څوځلې نیوکې پرې شوي دي.

له دې مخکې هم داسې راپورنه خپاره شوې وو، چې د داعش وسله والې ډلې کسان د ښځو له کالیو په استفادې سره ترکیې هېواد ته ورغلي او له هغه ځایه بیا اروپايي هېوادونو ته تللي دي.

دا په داسې حال کې ده، چې د دغو هېوادونو سلګونه ځوانان په داوطلبه ډول له دعش وسله والې ډلې سره یوځای شوي دي.