خوست داکترلری کیلهسی بیر هفته گه قدر آیلیکلری تولنمهگن صورتده، ولایت بوتونلی تومنلری دهگی کسلخانهلر ایشیگی یاپیلیشیدن آگاهلنتیرهدیلر.
بوداکترلرگه کوره، آلتی آیدن بویان اولرنینگ آیلیکلری «هِلت نِت» ناملی موسسه تامانیدن تولنمهگن.
داکترلر تامانیدن سلاموطندار بیلن صحبتگه حاضر بولگن «بیبیاچاس» کسلخانهسی اعضالریدن بولمیش نورالله نینگ ایتیشیچه، شو حاضر ولایت بویلب 33 کسلخانه ساغلیقنی سقلش اوچون فعالیت قیلیب کیلماقده، مذکور کسلخانه داکتر و ایشلاوچیلری سانی 700 کیشیگه ییتیب بارهدی.
5 ییلدن بویان هلت نت موسسهسی بو ولایت کسلخانهلرینی تمویل و ایشلاوچیلر نینگ آیلیکلرینی بیرردی.
ولایت مندوزی تومنینینگ کسلخانهسی باشلیغی داکتر فریدالله نینگ سلاموطندارگه ایتشیچه، هلت نت موسسهسی کسلخانهلر ایشلاوچیلری نینگ آیلیکلرینی تولمهگنلیگی سبب شرطنامهنی قولدن بیرگن.
اونینگ بیلدیریشیچه، ولایت کسلخانهلرینی تمویل قیلیش اوچون بومرته ادا موسسهسی قازانگن.
اونگه کوره، تاپیلگن معمالر اوچون نیچه مرته ساغلیقنی سقلش وزیرلیگی جریانگه قویلگن ولی حاضرگه قدر قیسی ایجابی جواب مذکور وزیرلیک تامانیدن بولرگه بیریلمهگن.
معلوماتلرگه کوره، اوتمیش 3 آیدن بویان خوست ولایتی کسلخانهلری نینگ تمویل قیلیش مسولیتی ادا موسسه سیگه بیریلگن و داکترلر آیلیگی ایسه اوشبو موسسه آرقهلی توله نیلهدی.
باشقه تاماندن ایسه خوست اهالیسی داکترلردن معمالرینینگ مذاکره قیلشلری بیلن حل قیلیب ساغلیق خدماتلرینی ولایتده دوام بیریشلرینی ایستهیدیلر.
خوست یشاوچیلریدن بیری نثارالله احسان نینگ ایتیشیچه، داکترلر ایشلرینی توخته تیشلری بیلن اهالی گه ضرر ایتکیزهدیلر. اونگه کوره، مذکور قیینچیلیک ساغلیقنی سقلش وزیرلیگی تامانیدن حل بولیشی کیرهک.
دیمک، خوست ولایتی ساغلیقنی سقلش ریاست باشلیغی داکتر هدایتالله حمیدینینگ ایتیشیچه، مساله اولکه ساغلیقنی سقلش وزیرلیگیگه ییتکیزیلگن و کیلهسی بیر آیگه قدر داکترلر آیلیکلری تولش وعدهسی بیریلگن.
