افغانستان تینچلیک لایحه‌سی بوییچه آمریکا خاص نماینده‌سی زلمی خلیلزاد نینگ ایتیشیچه، اوتگن "سه‌شنبه" کونی کابل و ننگرهار ده یوز بیرگن قانلی هجوم‌لرنینگ عاملی داعش گروهی دیر. اونینگ ایتیشیچه، آمریکا تیکشیریش‌لریگه کروه، کابل و ننگرهار ده یوز بیرگن هجوم داعش گروهی تامانیدن صورت تاپگن.
بوگون "جمعه" جناب خلیلزاد نینگ توییتر صحیفه‌سیده یازیشیچه، داعش نینگ خراسان بولیمی شونده‌ی هجوم‌لرنی انجام بیریش بیلن افغانستان و دنیا ده کته تهدید سنه‌له‌دی.
اونینگ کوپه‌یتیریشیچه، داعش گروهی امریکا و طالبان آره‌سیده امضا ایتیلگن شرطنامه‌گه قرشی دیر و افغانستان‌ده فرقه‌یی اوروش‌نی رواجلنتیریش اوچون سعی و حرکت قیله‌دی.
خلیلزاد نینگ یازیشیچه: «آمریکا حکومتی نینگ تیکشیریش‌لریگه کوره، کابل و ننگرهار ده یوز بیرگن هجوم‌لر داعش تامانیدن اویوشتیریلگن. اوشبو گروه افغانستان‌لیک‌لر و دنیا یشاوچیلری اوچون کته تهدید دیر.»
افغانستان تینچلیک لایحه‌سی بوییچه آمریکا خاص نماینده‌سی، افغانستان دولتی‌دن داعش گروهی تینچلیک سوزلشوولرنی اوز مسیریدن چیقاریشی اوچون رخصت بیرمه‌یشینی سوره‌گن.
اوتگن "سه‌شنبه" کونی کابل غربیده بولگن 100 یاتاق‌لیک کسلخانه و ننگرهار ده بیر جنازه مراسمیده اویوشتیریلگن هجوم عاقبتیده، کمیده 50 کیشی هلاک و باشقه 80 کیشی یره‌لنگن ایدی.
مذکور هجوم‌لردن سونگ، طالبان گروهی بیر اعلامیه آرقهلی، کابل و ننگرهار ده یوز بیرگن واقعه‌لرگه قول‌لری بولگنی‌نی رد قیلیب و داعش گروهی‌نی بو هجوم‌لرده مسوول عنوان قیلگن.
