د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد وايي، د افغانستان دولت او طالبان هڅه کوي چې د تاوتریخوالي په ډېروالي سره د سولې خبرواترو پر مېز لاسبري واوسي. نوموړي دغه خبرې پرون د امریکا له سولې انسټېټیوټ سره په انلاین مرکه کې کړې دي.
هغه په افغانستان کې د تاوتریخوالي ډېروالی د منلو وړ نه بولي او ټینګار کوي چې دواړه لوري یې باید د کمولو لپاره اقدام وکړي.
خلیلزاد د دولت او طالبانو ترمنځ د سولې خبرې اترې د افغان سولې پروسې زړه یادوي او په وینا یې، د تاوتریخوالي ډېروالی د دواړو لوریو ترمنځ د باور فضا او پر سولې د خلکو باور ته ته زیان رسوي.
د نوموړي په وینا، د تاوتریخوالي کموالی د سولې په پروسه کې وروستی ګام دی، هغه زیاتوي، طالبانو منلې چې دایمي او هراړخیز اوربند دې د دولت او طالبانو ترمنځ د سولې خبرواترو په اجندا کې شامل شي او ترهګرو ډلو ته اجازه نه ورکوي چې له افغان خاورې د امریکا پر وړاندې ګټه واخلي.
زلمي خلیلزاد سولې ته د طالبانو د رښتینې ژمنتیا په ځواب کې ویلي: «هغوی (طالبان) وايي چې خبرواترو بل بدیل نشته او د ټولشموله افغانستان پلوي کوي او غواړي چې په سیاسي برخه کې شریک او د نړیوالې ټولنې له لوري ومنل شي.»
خلیلزاد له نړیوالې ټولنې غوښتي چې پر افغان سولې ډېر تمرکز وکړي. هغه په افغانستان کې د امریکايي ځواکونو د کموالي په اړه ویلي، د سږ کال تر مني پورې به د یادو ځواکونو شمېر تر څلورو یا پنځو زرو پورې را کم شي.
د نوموړي په وینا، د امریکايي ځواکونو ډېر کموالی د سیمې په وضعیت او طالبانو د ژمنو په عملي کېدو پورې تړلی دی.
د افغان سولې لپاره د امریکا د بهرنیو چارو وزارت ځانګړی استازی داسې مهال د دولت او طالبانو له لوري د تاوتریخوالي د ډېروالي په اړه خبرې کوي چې د قطر په دوحه کې د دولت او طالبانو ترمنځ د سولې خبرې اترې څوارلس ورځې وړاندې پیل شوې، خو تر اوسه د دواړو لوریو د تماس ډلې نه دي توانېدلي چې د خبرواترو پر کړنلارې شته اختلافونه لرې او وروستۍ هوکړې ته ورسېږي.
