افغانستان تینچلیگی بوییچه آمریکا خاص نمایندهسی زلمی خلیلزاد کابل و ننگرهار ولایتیدهگی سونگی هجوملرنی قارهلب و بو هجوملرنی «دهشتلی» دیگن. اونگه کوره، آمریکا افغانستان اهالیسی نینگ بو وضعیتی نی درک قیلیب و اولر بیلن غمشریکلیک قیلهدی.
اونینگ اورغولشیچه، افغانستان نینگ اوروشی حربی یولدن حل بولمهیدی، شونینگدیک اهالی اوروشدن خسته بولگن و برچه اوروش تامانلری زوروانلیکلرنی کمهیتیریشلری کیرهک.
جناب خلیلزاد اوشبو بیاناتلرنی اوتگن کون (جمعه 26- ثور) آمریکا تشقی ایشلر وزیرلیگی تامانیدن افغانستان وضعیتی توغریسیده یولگه قوییلگن برنامهده ارایه قیلگن.
خلیلزاد نینگ کوپهیتیریشیچه: «افغانستان نینگ اوروشی یکونلهنیشی اوچون تینچلیک کیلیشووی و سیاسی بیر ییچیم یول توغری بیر گزینه دیر.»
باشقه بیر تاماندن جناب خلیلزاد آمریکا و طالبان آرهسیده امضالنگن تینچلیک کیلیشوونامهسی توغریسیده ایتیشیچه، طالبان گروهی زوروانلیک نی کمهیتیریش خصوصیده سوز بیرگن، بیراق بو کیلیشوو بیللی بیر شکلده طالبلردن افغانستان امنیتی کوچلریگه هجوم قیلمهسلیکلرینی ایستمهگن.
آمریکا خاص نمایندهسیگه کوره: «افغانستان امنیتی کوچلرگه هجوم قیلمهسلیک کیلیشوونامه گه شامل ایمس دیر، بیراق اولر (طالبان) کیلیشوونامه نینگ روحی نی نقض قیلیشگن.»
اوتگن هفته کابل غربی دشت برچی منطقهسیدهگی بیر کسلخانه و ننگرهار ده بیر جنازه مراسمی ده اویوشتیریلگن هجومده اونلرچه کیشی هلاک و یرهلندی.
اوتگن کون خلیلزاد بیر توییت آرقهلی بو هجوملرنی داعش گروهی نینگ خراسان شاخهسیگه نسبت بیردی. اونگه کوره، آمریکا نینگ تیکشیرووی اساسیده، کابل و ننگرهار ده یوزبیرگن حادثهلرنینگ عاملی داعش گروهی دیر.
اونینگ کوپهیتیریشیچه، داعش گروهی افغانستان ده تینچلیک تأمین ایتیلیشی نی ایستمهیدی و شو یوزهدن زوروانلیکلرنی کوپهیتیریش اوچون سعی و حرکت قیلهدی.
