بوگون «یکشنبه» خبری بیر ییغین اوتکزگن سیلاولر شکایتلریگه تینگلش کمیسیون باشلیغی عبدالعزیز آریایی، نمایندهلر کینگشی و تومنلر کینگشی سیلاولری یولگه قوییلیش تأریخینی اعلان قیلیب و ینه بیر بار حکومتدن سیلاولر شکایتلریگه تینگلش کمیسیون دبیرخانه باشلیغینی اولرگه تانیشتیریشینی سورهدی.
جناب آریایی گه کوره، اولر کمیده 11 آی آلدین، دبیرخانه ریاستی اوچون 3 نامزد رویخطینی جمهورلیک ریاستی گه یوبارگن، بیراق حاضرگچه جمهورلیک ریاستی بو توغریده هیچ بیر ایش قیلمهگن.
جمهورلیک ریاستی مطبوعات دفتری سرپرستی شاهحسین مرتضوینینگ ایتیشیچه، سیلاولر شکایتلریگه تینگلش کمیسیونینینگ دبیرخانه نامزدلری رویخطی قندهیلیگی و تقدیریدن اولرنینگ خبری یوق دیر.
باشقه تاماندن، سیلاولر ایرکین کمیسیونی باشلیغی گلاجان بدیع صیادنینگ ایتیشیچه، جاری ییل 28- میزان نمایندهلر کینگشی و تومنلر کینگشی سیلاولری یولگه قوییلهدی، بیراق بوندهی بیر شرایطده سیلاولر یولگه قوییلیشی ایریم قیینچیلیکلردن بوش ایمس.
جناب صیادگه کوره، تنیق، عدالتلی و ساختهکارلیکدن اوزاق سیلاولر یولگه قوییلیشی اوچون ایریم اصلاحاتلر قولگه آلینگن.
سیلاولر ایرکین کمیسیونی باشلیغینینگ ایتیشیچه، آواز بیرووچیلرنی رویخطده آلیش ایشی 25- حملده باشلنهدی و بیرینچیدن شهرلر، اوندن سونگ تومنلرنی مرکزلری و کیین ایسه قیشلاقلرده عملگه آشیریلهدی.
