هلمند ولایتینینگ خانشین تومنی قیتهدن ملی کوچلر ادارهسیگه اوتدی. بو تومن اون کون آلدین جنگری طالبلر اشغالیگه اوتگن ایدی. خانشین جنگری طالبلر نظارتیدن چیقاریلیشی اوچون شنبه کون عملیات باشلنگن ایدی.
اما، ولایتی کینگشنینگ بیر قنچه اعضالری، جنگری طالبلر فقط تومننینگ مرکزیدن چیقاریلگن دیگنلر. اولرگه کوره، هنوزگچه افغان ملی کوچلری تومننینگ ولسواللیک بناسیگه کیره آلمهگنلر.
اوتگن بیر آی ایچیده بو ایکّینچی مرته خانشین تومنی جنگری طالبان تامانیدن اشغال ایتیلهدی.
هلمند و لایت والیسینینگ سوزلاووچیسی عمر زواک، عصیانچی طالبلر تصرفیده بولگن منطقهلرنی آزاد قیلیش اوچون ملی امنیت، اردو و پولیس کوچلری عملیات اوتکزگنلر دیگن. او، منطقهلرده وضعیت یخشی ایکنلیگینی بیلدیرگن.
سوزلاووچی، خانشین تومنیگه ییترلی درجهده ملی کوچلر یوبارلگنلیگینی تیلگه آلگن. ایتیلیشیچه، خانشین تومنی تیزلیکده بوتونلی قوراللی جنگریلر نظارتیدن چیقاریلهدی.
لیکن، ولایتی کینگشنینگ قطار اعضالری، افغان ملی کوچلری ولسواللیکنی بوتونلی قولگه کیرتیشگه موفق بولمهگنلیکلرینی بیلدیرگنلر. کینگشنینگ اعضالری بولیمش بریالی نظری و عطاالله افغان، قوراللی طالبلر کونگیلی روشده بو تومننی افغان ملی کوچلریگه بیرگن دیگنلر. اولرگه کوره، افغان ملی کوچلری، تومن مرکزینی تصرف قیلگن حالده، کته موفقیتلی ایشنی عملگه آشیرگن بولهدی.
هلیگچه قوراللی طالبلر تامانی بو بارهده بیرار نرسه دیمهگن.
