اخیرگی وقتلرده ترقه تیلگن گزارشلرده طالبان کویته کینگشینینگ ادارهسی پاکستاننینگ پیشاور شهریگه کوچیریلیب، حقانی ترماغی ادارهسی آستیده بولگن منطقهده فعالیت دوام تارتیشی حقیده یازیلگن.
شونینگدیک گزارشده طالبلرنینگ مهم بولیملریگه ینگیدن شخصلر تعین ایتیلگنلیگی بارهسیده خبر بیریلهدی. لیکن، تحلیلچیلر کویته کینگشی پیشاورگه کوچیریلگنی بیر فروپاگند دیگنلر.
پاکستاننینگ کویته شهریدهگی آزاد خبرچی زراق برقنینگ سلاموطندارگه ایتیشیچه، طالباننینگ کویته کینگشی پیشاورگه کوچیریلگنی توغریسیده هنوزگچه پاکستان اخبارات واسطهلریده خبر ترقه تیلمهگن دیگن.
جناب برقنینگ سوزلریگه قرهگنده، بوندن نیچه وقت آلدین کویته کینگشیده، قوراللی طالبلر صفیدن جدا بولگن ناراضی طالبلر قیتهدن بو حرکتگه آلیب کیلینیشلری اوچون قرار آلینگن.
بیراق، ییغین تفصیلاتی توغریسیده هنوزگچه بیرار نرسه دییلمهگن.
سیاسی تحلیلچی وحید مژدهنینگ ایتیشیچه، کویته کینگشی پیشاورگه کوچیریب باریلیشی امکاندن اوزاق. جنگری طالبلر افغانستان بیلن چیگره داش ولایتلرده کوپراق فعالیت قیله دی؛ بو کینگش پیشاورگه کوچیریلیب باریلیشی حرکتنینگ منفعتیگه ایمس دیدی جناب مژده.
مذکور اظهاراتلر سونگی کونلرده قوراللی طالبلرنینگ مملکت بویلب هجوملری سیزیلرلی درجهده آشگن بیر پیتده بیلدیریلماقده.
