هلمند ولایتی‌دن کیلگن گزارش‌لرگه کوره، مذکور ولایت‌نینگ امنیتی کوچلری موسی قلعه و نوزاد تومن‌لرینی بوتونله‌ی طالب‌لرگه تاپشیرگن.
هلمند والیسی میرزاخان رحیمی‌نینگ سلام‌وطندارگه ایتیشیچه، امنیتی کوچلر مذکور تومن‌لردن تکتیکی شکلده آرقه‌گه چیکیلگن و ایسته‌گن صورتده، قیته‌دن نظارت‌گه آلیب بیله‌دی.
جناب رحیمی‌نینگ ایتیشیچه، اولر موسی قلعه بیلن نوزاد تومن‌لریدن باشقه منطقه‌لرنینگ امنیتی‌نی تأمین‌لش اوچون چیقگن‌لر.
هلمند یشاوچیلری‌نینگ ایتیشیچه، اوشبو تومن‌لر بیر کیلیشوو اساسیده، طالب‌لرگه تاپشیریلگن و حکومت مذکور ولایت‌نینگ شمالی تومن‌لرینی طالب‌لر بیلن معامله قیلگن.
اوشبو یشاوچی‌لرنینگ طالب‌لردن نقل قیلیب ایتیشیچه، حکومت بیلن مذکور گروه‌نینگ کیلیشووی اساسیده، موسی‌قلعه، سنگین، نوزاد، کجکی و باغران تومن‌لری‌نینگ برابریده طالب‌لر برچه قرارگاه‌لرینی جنوبی تومن‌لردن شمالی تومن‌لرگه انتقال بیره‌دی.
موسی قلعه یشاوچی‌لری شاه ولی و محمدگل‌نینگ ایتیشیچه، اولرنینگ ایشیتیش‌لری اساسیده، حکومت طالب‌لرگه 100 میلیون دالر بیره‌دی و اولر شمالی تومن‌لرنی قیته قوریب و بدلی‌ده تینچلیک لایحه‌سیگه قوشیله‌دی.
مذکور تومن یشاوچی‌لریدن باشقه بیری عزت‌الله‌نینگ ایتیشیچه، طالب‌لرنینگ کویته کینگشی هم اوشبو تومن‌لرگه کیلیب و تینچلیک لایحه‌سینی شو ییردن دوام بیریش‌گه قرار قیلینگن.
بیراق، هلمند والیسی اوشبو ادعالرنی رد قیلیب ایتیشیچه، بونده‌ی بیر معامله یوزبیرمه‌گن و کیله‌جک‌ده هم بیری بیر کیلیشووگه قول قوییلیشی بیللی ایمس.
جناب رحیمی‌نینگ ایتیشیچه، جمهور رییس غنی نیچه مرته مملکت منفعتی‌نی تینچلیک قربانی قیلمس‌لیگینی ایتگن. اونگه کوره، حکومت امنیتی کوچلرنی، اوشبو تومن‌لردن چیقارگن؛ بیراق طالب‌لرگه تاپشیرمه‌یدی.
هلمندنینگ شمالی تومن‌لری شونده‌ی بیرحالده طالب‌لرگه قوییب یوباریله‌دی کیم، حکومت مذکور ولایت‌نینگ یالغیز اوچ جنوبی تومنی اوستیگه حاکم بولگن و هلمند جنوبی‌نینگ ایریم منطقه‌لری طالب‌لرنینگ نظارتی‌ده قرار تاپگن.
